KUCHING: Parti Rakyat Sarawak (PRS) nyukung transparensi ba atur belanja sereta ngarap Atur Pengawa Bepilih sentang pekara nya diubah ngambika semua parti mantai penatai belanja ti dikena.
Presiden Tan Sri James Masing madah, iya ngarap raban penyakal nyukung ubah nya enti pekara nya dibantaika di parlimen.
“Kitai deka nemu sapa ke melanja DAP. Enti bisi undang-undang, Komiti Pengawa Bepilih (EC) nemu sapa ke meri belanja ngagai tiap parti,” ku iya.
Masing mansutka jaku tu ba sebengkah aum pengarang berita pengudah nyadi chairman Aum Kunsil Besai PRS di Indu Opis Parti ditu, ensanus.
Masing ke mega Menteri Pemansang Tanah madah enti polisi transparensi nya dikena, orang kaya ti melanja parti patut madah ngagai EC.
“Enti nuan deka melanja RM10 juta ngagai parti politik, nuan patut madah pekara nya ngagai EC ke alai pengawa nya sigi enda salah.
“Ari nya kitai nemu sapa melanja sapa…anang main belakang (belalai),” ku iya.
Taja pia, Sapit Presiden Datuk Joseph Entulu madah, ubah nya pedis deka dipejalai ketegal tetap deka dibantah kaban parlimen ari penyakal.
“Nadai mai pemaik Menteri Besai mantaika pekara nya ba parlimen.
“Perambu ubah nya sigi enda ngelebus renggat konsultatif ketegal balat dibantah DAP. Enti pia nadai kebuah kitai deka mai pekara nya dibantai di parlimen.
“Kitai Barisan Nasional (BN) enda ngembuan 2/3 majoriti ti tau ngasuh ubah tu diterima parlimen,” ku Entulu ke mega Menteri ba Opis Menteri Besai.
DAP balat betalatka sentang transperansi tang sida empu enda nyukung ubah ba pekara tu, tandu iya.