Opis Kaunsil ti pemadu mayuh bulih chukai pintu dibanding opis kaunsil bukai di serata Sarawak
Dikarang Chris Bishop //
KUCHING: Opis Kaunsil Kandang Padawan (MPP) bulih pemadu mayuh chukai pintu di serata Sarawak enti dibandingka enggau opis kaunsil bukai, ku Chairman MPP Lo Khere Chiang.
Bejaku rambau pengerami genap 19 taun MPP diangkat nyadi Majlis Perbandaran Padawan, Lo madah penyampau asil chukai pintu ke digumpul MPP diatu manggai RM25 juta, lalu jauh nambah ari penyampau ke dikumpul ba taun 1996, RM8 juta.
“Dalam timpuh 19 taun udah nyadi Majlis Perbandaran, penyampau pemayar chukai pintu enggau penyampau asil chukai ke digumpul nambah tiga kali lipat.
“Naka 1 Januari 2015, penyampau pemayar chukai pintu bisi 69,355 iku tang diatu penyampau nya nambah ngagai 70,968 iku lalu disadang manggai 71,850 iku ba pengujung taun tu.
“Puku rata pengerembai chukai pintu urung tiga peratus tauka 2,500 iku pemayar chukai pintu setaun, tandu iya.
Ketegal nya, Lo madah geran ke diterima ari perintah besai enggau nengeri udah mega nambah ninting taun.
Ambika chunto, pengawa ngintu pemanah jalai alun nengah geran MARRIS udah nambah ari RM4 juta ngagai RM16 juta.
“Ketegal pemansang ke majak ngerembai ba kandang endur ke dikuasa, tanggungpengawa MPP mega majak nambah.
“Mayuh agi begunan didiri reti nya mayuh agi chukai pintu deka dikumpul tang kitai mega deka nyendiaka perengka guna sereta meresi semua uras ke dibuai,”ku iya.
Kandang endur ke dikuasa MPP tebal agi ngelingi mengeri Kuching iya nya 1,431.82 KM persegi, 3 kali lipat pemesai kededua bandaraya di mengeri tu, tandu iya.
Ngenang kaul ke sama, Lo madah rayat mega nginginka serbis ke manah seikas enggau servis ti disediaka DBKU enggau MBKS.
Ku iya, MPP ke nyadi otoriti menua enggai nyadi enda majakka pengawa ngemanaka serbis ti disedia ngambika ulih nyanggup pinta enggau peneka urung 340,000 rayat.
Dulu agi ari nya, Lo madahka Kuching Rural District Council (KRDC) udah ngepunka operasyen kena 1 Januari 1957.
Kena 1 Ogos 1996 Kepala Menteri maya nya, Pehin Sri Abdul Taib Mahmud udah ngubah status KRDC nyadi Majlis Perbandaran tauka MPP nyentukka diatu.
Kenyau diangkat nyadi Majlis Perbandaran, kandang endur ke dibaruh kuasa MPP udah ngerembai mansang ninting taun, ku Lo.