Penetap nya bisi dalam federal konstitusyen tang pengusut ba jalai pengarap Kristian dipunka ektrimis dalam perintah BN
Dikarang Chris Bishop //
KUCHING: Chairman Parti Keadilan Rakyat (PKR) Sarawak Baru Bian muji Kepala Menteri ketegal ti sekali udah netapka peranak Kristian Sarawak tau ngemeranka batang pengarap diri nadai betagang sereta tau nguna leka sebut ‘Allah’.
Datuk Patinggi Tan Sri Adenan Satem didinga mansutka jaku tu rambau pengawa nyuaka surat pala tanah ke diatur di Balai Mensia Mayuh Serian kena 14 Ogos tu tadi.
Taja pia, Baru ke mega Kaban Kunsil Nengeri (ADUN) Ba’Kelalan madah, pekara nya sigi udah dipasuk ba undang-undang nengah federal konstitusyen lalu nyadi hak peranak Sarawak ke megai pengarap Kristian.
“Pekara ke amat, Datuk Patinggi Tan Sri Adenan Satem sigi udah nemu bisi atur ke bechiping sentang pengelantang ngemeranka jalai pengarap ba Semenanjung Malaysia.
“Perintah Barisan Nasional (BN) ke disukung Adenan mih ti udah nutup mata sereta ngasuh pekara tu nyadi di Semenanjung Malaysia ke alai ulah raban ektrimis dilakka aja,” ku iya.
Baru nambah, pekara nya majak tusut pengudah Menteri Pekara Dalam Menua ngepunka isu ‘Allah’ lalu nagang surat berita Herrald nguna leka sebut nya.
Ku iya Menteri Pekara Dalam menua udah ngapil ngagai Kort Federal pengudah gerija dikemendar nguna leka sebut ‘Allah’.
“Kort Federal udah nya lalu nagang gerija nguna leka sebut nya. Kepala Menteri patut nemu dia kort federal nya tau endar nyadika kebuah raban ektrimis ngelaban kitai di Sarawak jemah.
“Aku udah suah madah dia raban ketuai deka beganti, tang undang-undang deka mengkang baka nya belama,” ku iya.
Pemar tu nyadi ari raban orang ektrimis dalam perintah BN lalu kepala menteri nguna isu tu dikena iya ngulihka sukung ari peranak Sarawak, tandu Baru.
Baru pechaya kepala menteri udah nguna isu nya nyadika terabai peranak Sarawak ngelaban orang ektrimis ari Semenanjung Malaysia.
Enti iya udah nemu kaling iya ba BN di Semenanjung Malaysia enda bebasaka hak kitai ditu, Adenan patut melaraka kaul enggau sida arika mengkang meri sukung.
“Chara pemadu manah iya nya peranak Sarawak badu agi ngundi Perintah BN ti udah ngepunka semua isu tu.
“Perintah BN sebaka penyakit riman ti patut dibuai ngambika kitai seruran ulih ngemeranka pengelantang bejalaika pengawa ke bekaul enggau batang pengarap,” ku iya.