MERADONG: Mensia mayuh diperansang sampal datai nyukung Pesta Limau Bintangor 2015 ti deka diatur berengkah 30 Ogos nyentuk 6 September tu ba Pasar Bintangor ditu.
Pesta Limau udah nyadi aktiviti tiap taun Opis Pelilih Mit Meradong kenyau ari taun 2009, lalu rambai jaku Pesta Limau Bintangor 2015 iya nya ‘Berpesta Untuk Perpaduan dan Kemajuan Rakyat’.
Tuju Pesta Limau diatur kena meri awak tauka peluang ngagai Pelilih Mit Meradong dipasukka dalam kar palan dagang temuai lebih agi renggat Pelilih Menua Sarikei enggau renggat Nengeri Sarawak.
Kelimpah ari nya, Pesta tu mega kena ngerapitka kaul sereta kerejasama enggau penyerakup entara pupu bansa senipak enggau atur pengawa pemansang enggau transformasyen di menua pesisir seraya meri awak ngagai semua ngambi bagi dalam aktiviti ekonomi, sosial, main asal sereta lumba enggau main.
Nambahka nya objektif Pesta Limau nya mega dikena ngelakuka produk betanam betupi menua tu sereta asil bukai berindik ari nya, senipak enggau juluk Meradong deka nyadi pelilih menua Tibang Pemakai.
Pengawa nya mega dikena meransang aktiviti dagang ti produktif nengah pengawa eko-dagang temuai.
Bepelasarka penerang ari opis nya, dipelabaka pesta nya deka dipenyadika Menteri Pemansang Rama ti mega Kaban Parlimen Saratok Tan Sri William Mawan Ikom kena 30 Ogos tu.
Lalu pengerami nangguhka aktiviti nya dipelabaka deka dipenyadika Kaban Parlimen Tanjung Manis Datuk Norah Tun Abdul Rahman.
Nyerumba lapan hari pesta nya diatur, mayuh bengkah program udah ditusun baka Pekit Bola Tampar, Badminton sereta Bola Keranjang, Kempen Kebersihan Perdana, Pameran Pertanian & Hasil Jualan, Pertandingan Miss Limau Bintangor 2015 enggau mayuh agi program bukai.
Entara program ti ulih narit tauka matak temuai sereta mensia mayuh iya nya Pesta Air baka Lumba Perau Laju sereta Perarakan Tanglung enggau Kereta Berhias.