Aku udah minta ungkup belanja RM500 juta ari perintah besai dikena ngemujurka juluk nya
LUNDU: Agi mayuh pemansang deka digaga di menua pesisir dikena ngerapitka bida pemansang entara kandang nengeri enggau menua pesisir, ngambika tikas ekonomi rayat di kededua piak nya enda kelalu besai bida, ku Kepala Menteri Datuk Patinggi Tan Sri Adenan Satem.
Ku Adenan, menua pesisir agi begunaka mayuh ungkup belanja dikena ngaga mayuh agi pemansang ngambika pemansang nya sebaka enggau di nengeri.
“Nya alai, ba ungkup belanja pemansang, aku empu udah minta ngagai Perintah Besai lebih RM500 juta dikena ngemansangka menua pesisir,” ku iya.
Iya madah munyi tu lebuh bejadika Projek Ngemanahka Jalai Pantai Pandan ke Kg Belungei enggau Pugul, Lundu ditu, kemari.
Sama bisi ngulu atur pengawa nya, Sapit Kepala Menteri Datuk Patinggi Tan Sri Alfred Jabu, Menteri Pemansang Infrastruktur enggau Penyambung Dato Sri Michael Manyin, Menteri Muda Pemansang Menua Pesisir Datuk Julaihi Nahrawi, Menteri Muda Pengerai Mensia Mayuh Datuk Dr.
Jerip Susil enggau Menteri Muda Pemansang Tanah, Gramong Juna.
Ngena ungkup pemansang lebih RM500 juta nya ila ku iya, penyampau nya deka dibagi ke alai RM100 juta deka dikena ngagai jalai sereta jematan di menua pesisir.
“Ari penyampau nya, RM100 juta deka diambi ari penyampau RM500 juta dikena ngaga jalai enggau jematan.
“Enti kitai agi begunaka belanja lebih ari ungkup nya, aku deka minta baru dalam bulan November tu ila,” ku iya.
Ungkup belanja nya dipelaba deka manggai lebih RM500 juta laban beratika lanskap geografi menua Sarawak tu ke bebukit ke lebih agi di menua pesisir.
“Dibanding enggau menua di Semenanjung, kitai ditu (Sarawak) agi jauh tinggal ari sukut pemansang.
“Kitai bisi jalai, tang jalai kitai jalai kelas ke pemadu baruh, baka nya mega enggau bekal ai paip enggau karan,” ku iya.
Ku Adenan baru, beratika penanggul ti ditapi di menua pesisir, iya empu udah madah ngagai Menteri Besai ngasuh iya ngasaika kediri empu bakani ku penyuntuk mensia mayuh di menua pesisir ke nadai perengka guna infrastruktur nya.
“Aku suah madah ngagai Perintah Besai bekaul enggau pengurang penyikap infrastruktur ti ditapi rayat di menua pesisir sereta deka mantu sida ke seranta,” ku iya.
Kena mantu rayat menua tu betapi enggau pemar barang diatu, ke lebih agi berasai endar ba rayat di menua pesisir ti nadai meruan penatai pemisi, Adenan madah elawin ke orang seranta deka ditambah.
“Manggai ujung taun tu ila, baru aku madahka penyampau elawin ti deka ditambah ungkup orang ke seranta nyengkaum orang ke timpang pendiau (OKU),” ku iya seraya madahka nya entara sebengkah pekara ti dikemeratka iya sekumbang udah setaun nyadi Kepala Menteri.
Baka nya mega dalam pekara bekaul enggau royalti minyak ti dipinta Sarawak ditikika ngagai 20 peratus ari 5 peratus ke diatu.
“Peminta royalti minyak nya lalu bedau mujur nyentuk ke diatu, taja pia peminta nya deka dipajakka taja pan Petronas udah besemaya deka ngungkupka RM2.1 Billion enggau RM100 juta kena ngaga palan teknikal.
“Beri aku lima (5) taun agi, beri aku peluang 5 taun agi ndur aku mandangka penyakah diri ke deka mantu rayat enggau menua tu,” ku iya.
Ku Adenan baru, kena 15 September tu ila, Menteri Besai deka bejadika jalai Pan Borneo Highway belabuh ari Telok Melano nyentuk ke Limbang.
“Tu deka ngangkatka ekonomi di tetiap sitak menua, palan pelajar (Matrikulasi Sentex) ti deka digaga ba pelilih mit menua Lundu dia,” ku iya nyengkaum projek ngaga ‘Waterfront’ di Sematan enggau Lundu.
Projek nya mungkur pengawa ngaga jalai standard R3 ke sepenyauh 11.7 km ari Tebing Tasik Pandang nuju Kg Belungei sereta Kg Pugu nyengkaum ngagai tiga buah jematan kayu ke udah bisi dia.
Projek nya deka ngangkatka sosio ekonomi ngagai tikas ke tinggi agi laban tebal agi rayat ke nguan pelilih mit menua nya ngemeranka pengawa berikan enggau bumai.
Sebedau nya, Menteri Pemansang Infrastruktur enggau Penyambung Dato Sri Michael Manyin madah, projek nya ila deka ngangatka tikas ekonomi urung 3,000 iku mensia mayuh ti diau di sitak nya, ke alai tebal agi sida tu ngemeranka pengawa bumai enggau berikan.