Penyeranta ukai penanggul ngulihka penyulut

0
UKAI PENANGGUL: Fatimah (tengah) nyuaka bantu beg sekula enggau gari lumba enggau main ungkup seiku ari nembiak sekula maya atur pengawa nya ditu, kemari.

UKAI PENANGGUL: Fatimah (tengah) nyuaka bantu beg sekula enggau gari lumba enggau main ungkup seiku ari nembiak sekula maya atur pengawa nya ditu, kemari.

Penusah ti ditapi dalam pengidup sesebengkah ruang bilik patut nyadi peransang nyapai pemujur

Dikarang Sandy Mark Luna //

KUCHING: Penyeranta tauka pemar dalam pengidup enda patut nyadi penanggul bala nembiak ngulihka pemujur enggau penyulut.

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, penyeranta enggau penusah pengidup nya patut nyadi peransang kena ngulihka penyulut sereta ngubah ngubah pengidup.

“Enda ngira bengkah penanggul ti ditapi, nembiak ulih mujur dalam pelajar enti sida ngembuan komitmen sereta fokus ba sesebengkah pekara ti dijuluk.

“Mayuh ti nyulut tauka mujur nyengkaum pemesai kitai diatu ti mega asal ari ruang bilik seranta, tang lebuh ngembuan juluk ati besai deka mujur, mekuh dalam pelajar, sida teulihka penyulut baka ti dipega kitai seharitu,” ku iya.

Iya mansutka pekara nya lebuh bejaku bejadi Majlis Penyerahan Sumbangan Pakaian Sukan dan Beg sekolah ti diatur ba Dewan St Hilda di Sekolah Kebangsaan St Mary ditu, kemari.

Sama datai ngagai pengerami nya Guru Besar SK St Mary Liaw Hui Lin, Presiden Persatuan Jurufoto Akhbar Sarawak (SPPA) Mohd Razi Bujang enggau Penolong Pengurus Bank Rakyat Cawangan Padawan, Mohd Shah Amir.

Fatimah madahka faktor penyeranta ukai pekara ti baru nyengkaum ba mengeri tang lebih nyengenda di kandang menua pesisir.

Ambi ke chunto di SK St Mary aja ku iya, urung 10 peratus nembiak datai ari ruang bilik ti baruh penatai pemisi.

Berebak enggau tu, iya minta nembiak ngambika seruran ingatka sekula diri empu enti udah mujur jemah ila.

“Lebuh bisi kereja jemah ila, anang enda ingat mantu sekula sereta raban bansa nengah aktiviti pengelantang lebih agi dalam pengawa mantu nembiak ti tusah dalam pengidup,” ku iya.

Kelimpah ari nya muji sereta temegah ati ngagai SPPA ti enda ngetu ngatur aktiviti pengelantang ke nyadi sebengkah aktiviti gerempung ti udah manggai dua taun udah ditumbuhka.

Nitihku Radzi, aktiviti meri gari dikena lumba enggau main sereta kantung sekula iya nya program ti kedua kali udah diatur SPPA begulai enggau Bank Rakyat pampang Padawan, lalu sebedau tu iya nya taun nyin kemari diatur ba SK Green Road.

SPPA ngarapka program nya deka meri penguntung ngagai semua piak dikena ngerapitka takah entara sida ti bisi ulih enggau enda ulih meli sereta ulih meri peluang enggau penyambung ngagai pelajarsebela dalam atur pengawa ngenuku sereta nempa nembiak ti nyulut.

Entara aktiviti bukai SPPA iya nya mantu ngiga belanja dikena ngemanahka jematan SK Sibu Laut kelimpah ari kerejasama enggau sebuah kompeni korporat ngambika ulih meri enam set komputer ungkup sekula nya.