Pengawa tu nadai bebayar lalu rayat patut nemu penguntung asil ari nyukat kelingi tanah Adat Bansa Asal nya jemah ila, ku Entulu
SELANGAU: Rayat ditu kelebih agi sida ke ngempu tanah Adat Bansa Asal (NCR) patut nguna peluang nyukat tanah ke udah disedia perintah enggau manah ngambika sida ulih bekuasa penuh ngagai tanah nya.
Menteri ba Opis Menteri Besai Datuk Joseph Entulu Belaun madah, rayat patut nemu penguntung ke diulih nengah atur inisiatif baru nyukat kelinggi tanah NCR.
“Pengawa nyukat nya nadai dipinta bayar,” ku iya rambau bejadi Program Randau Nyukat Kelinggi Tanah NCR ke diatur ba Rumah Lipu, Bawang, Kemena, Selangau, kemari.
Seraya madahka pengawa nyukat tanah NCR tau ngujungka surat pala tanah ulih diberi, Entulu ngarapka semua orang ke bisi menggi tanah nemu pemesai reti guna enggau penguntung ari pengawa nya jemah.
Nya alai, pengempu tanah NCR enda ibuh mendingka propaganda penyakal ke ngumbai perintah deka ngerampas tanah rayat.
“Penyakal enda kala ngaga sebarang pekara manah tauka pengawa baka ke digaga perintah ngemansangka tanah rayat, tang sida bekelikuhka pekara nya ngena chara nguingka runding rayat ngambia enda ngemansangka tanah NCR sida,” ku iya.
Iya mega ngelalau raban pengempu tanah NCR ngenataika peminta sereta berunding manah-manah enggau Opis Tanah enggau Survei (JTS) sebedau bejalaika pengawa nyukat tanah.
Taja pia, ungkup tanah NCR ke agi bisi penyarut kelebih agi pasal entara enggau status pengempu tanah, JTS sigi enda bejalaika pengawa nyukat tanah nya laban penanggul ba tanah nya patut diputarka dulu.
Kaban Parlimen Selangau nya madahka, perintah nengah iring Menteri Besai, Datuk Seri Mohd Najib Tun Razak chukup terang mandangka penyiru dalam ngemujurka inisiatif baru nyukat tanah NCR ke tau meri penguntung ngagai rayat di nengeri tu.
“Nya alai, aku ngarapka rayat kelebih agi raban pengempu tanah NCR patut ngerebut peluang ke bisi disediaka perintah nya enggau manah awakka tanah NCR nya ulih dikenuku dipenggi rayat,” ku iya.
Sama bisi datai Sekretari Politik Menteri ba Opis Menteri Besai Adriana Chumang Nyambong, Pemesai Pelilih Selangau Christopher Ranggau Unting enggau Pemesai Pengatur Pekara Tanah JTS Sibu Ahmad Raslan, Pemancha Robert Nanta, Pengulu Boniface nggau bala tuai raban bansa.