Anang ngemeluka orang indu ba sebarang tanggungpengawa

0

MARUDI: Raban orang indu enda patut dikemeluka sida ke lelaki ba sebarang aja tanggungpengawa lalu orang indu mega patut diberi kuasa ke sebaka laban jeman diatu orang indu mayuh ngembuan penau sereta bepelajar tinggi.

Nya alai orang indu patut ngemansangka diri empu laban nadai menua tauka nengeri ulih maju enti sema orang indu nadai mansang, ku Fatimah ke mega nyadi Menteri Pengintu Pengelantang Pendiau, Orang Indu enggau Pemansang Ruang Bilik.

Iya madah munyi nya ba Program ‘Pemerkasaan Wanita DUN Marudi 2015’ ke diatur di Dewan Suarah Baram, apin lama ke udah.

“Tu sekalika dalam dunya pelajar, ekonomi enggau utai bukai enda ngira pengidup sekalika nya seranta tauka kaya, genap orang indu patut diberi awak ke sebaka ngambika sida ulih nyaup ngemansangka nengeri enggau menua,” ku iya.

Berindik ari nya mega, Fatimah nangkan bala orang indu anang enda nyikap diri enggau mayuh penemu dikena nambahka penatai pemisi ruang bilik diri.

Program tu bisi digulu urung 663 iku orang indu ari sitak N.66 Marudi nyengkaum ari menua Teruking, Nabor, Beluru, Pengalayan enggau Pasar Marudi.

Ngenang sentang peminta ADUN Marudi , Datuk Sylvester Entri pasal Pusat Dalam Komuniti (PDK) ke patut ditumbuhka di Beluru, Fatimah madahka nadai penanggul numbuhka palan nya asal iya enda kurang ari 10 iku sida ke timpang pendiau (OKU) dirijista dia.

Iya mega minta sida ngiga taba ke engkeman alai nirika palan nya sereta ngiga staf gawa ba palan nya ila.

“Enti atur nya udah dititih, isi pom ba Opis Menteri Pengintu Pengelantang Pendiau, Orang Indu enggau Pemansang Ruang Bilik ngambika ulih diperunding,” ku iya.

Sama bisi datai Menteri Muda Pelajar Tumu Nembiak enggau Pemansang Orang Indu, Rosey Yunos; ADUN Telang Usan, Dennis Ngau; Direktor Opis Pengintu Pengelantang Pendiau, Orang Indu enggau Pemansang Ruang Bilik Noriah Ahmad sereta Residen Bagi Menua Miri, Anthonio Kathy Galis.