MADAHKA PENATAI DIRI: James benung betelai berandau sereta madahka pejalai kaban PEDAS ngelawa iya ke benung diperubat di HUS ditu, kemari.
KUCHING: Berumban pengudah ninga berita seiku Bujang Berani Menua dipasuk ke Sepitak Besai Sarawak (HUS) sekeda kaban Serakup Dayak Sarawak (PEDAS) Pampang Kuching (PPK) bisi ngabas iya ke benung diperubat di HUS ditu kenyau ari lemai 25 Ogos tu tadi pengudah dipindah ari Sepital Sri Aman pagi sehari nya.
PEDAS diuluka Sapit Ketuai PPK, James Saga Bayang sereta kaban ke bukai datai ngusung Awang urung tengah hari kemari di Wad Emergency.
Bisi ngelalu penatai kami anak indu iya sereta uchu ke sebilik enggau iya, Tony Mat.
Nitih padah uchu iya, aki iya dianjung berubat ngagai Sepital Sri Aman ari rumah panjai sida di Nanga Skrang, Sri Aman, pengudah iya madahka diri pedis perut lalu lemi tulang.
Ku James, nitih penerang ari Mejar Jeneral Datuk Stephen Mundaw, aki iya,Awang Raweng berengkah gawa nyadi Iban Scout sebedau iya diserap ngagai Pelatun 10, Kompeni D, Batalion Ke-Satu Worcestershire Regiment di Malaya urung taun 1950 menya.
Tandu iya, Awang tu Bujang Berani tunggal ari menua Malaysia nerima Midul George Cross, midul kedua tinggi nitihka ripih midul dalam sistem soldadu United Kingdom (UK).
Iya mega nerima Midul Queen Elizabeth II Diamond Jubilee sereta Pingat Jasa Malaysia (PJM) disuaka Sapit Kepala Menteri Sarawak, Datuk Patinggi Tan Sri Alfred Jabu Ak Numpang dalam taun 2011 suba di Kuching.
Iya tu mega seiku orang ke balat dipebasa ari perintah UK.
Ngelansa cherita pemerani Awang tu, lebuh seraban 50 iku komunis ke nyerang kem sida di Kluang Johor kelia, mayuh raban sida midang/ lesi bebadi, semina seiku iya enggau prebet Hughes aja ke idup maya nya.
Iya bakal kena timbak ba berang enggau pah kanan.
Nya alai, ketegal pemerani nyelamatka seiku prebet orang putih ke benama G. Hughes, iya diberi Midul George Cross.
Nama iya digazette di London berengkah ari 20 November 1951.
Pia mega, nitih ku tusoi Datuk Stephen Mundaw, diatu Lt Dungging benung ngaga keretas kereja ngambika iya bulih pemendar diperubat ba wad 1st Class.
Pia mega, Datuk Stephen bisi ngarahka dua iku raban soldadu ngemataka iya di HUS lebuh malam hari, sereta Datuk Stephen dipelabaka datai ngabas Awang malam tu (kemari) di HUS.
Nyempulang pejalai nya, PEDAS mega bisi nyuaka pemeri ngagai Awang seraya meri basa sereta ngenataika peransang ngajihka iya jampat gerai.
PEDAS mega ngarapka NGO bukai, piak bekaul, raban ari opis perintah sereta orang ti ngatka diri ulih mantu sereta ngusung Awang seraya ngingatka jasa iya udah berambunka nyawa ngetanka menua kitai tu kelia.