NGARAPKA IYA JAMPAT GERAI: Awang Raweng (tengah) gegaring ngenatka pemedis di Wad Kecemasan SGH. Bela dipeda Janang (dua kiba) enggau Bit (kanan).
KUCHING: Kena ngelai sereta meri basa ke besai ngagai seiku Bujang Berani ke agi idup, penerima Bintang George Cross ari perintah British iya nya Awang Raweng, Parti Rakyat Sarawak (PRS) besemaya deka ngaga sebuah rumah ungkup iya dalam timpuh ke semak tu.
Sapit Sekretari Besai PRS Ir Janang Bunsu madah, tukuh rumah nya udah tembu digaga lalu pechaya rumah nya ulih digaga dalam timpuh setaun.
“Kitai udah numbuhka tabung endur ngumpul belanja ungkup pengawa ngaga rumah nya lalu ngarap pengawa ulih berengkah enggau lengkas.
“Rumah nya ila deka mandangka legasi Awang Raweng ke nyadi Bujang Berani tunggal idup penerima Bintang Berani, kedua tinggi ari menua komanwel, lalu deka digaga besendi enggau rumah lama iya diatu di Nanga Skrang,” ku Janang.
Dulu agi ari nya Janang ke disempulang Ketuai Publisiti Nembiak PRS Bit Surang enggau Jerryface Mason ngabas Raweng ba ‘Wad Kecemasan’ Sepital Besai Sarawak (SGH) ditu.
Raweng dipasuk ba SGH malam ensanus pengudah betapi enggau pemedis gelung perut ‘Intestinal Obstructive’ ti ngujungka iya mar bira tauka kemi.
Ngemeratka pengerai Raweng, Janang madah PRS nguji minta Raweng,86, dipindah ngagai wad ke menyana agi ngambi tau diperubat enggau engkeman.
“Kitai berasai sinu ngenang iya ti udah dipasuk berubat di SGH ditu. Kitai (PRS) deka minta iya dipindah ngagai wad ke menyana lalu tu meh bengkah pinta ti berat ari parti,’ku iya.
Ba penemuai nya, raban PRS tu bisi ngagihka bantu belanja ngagai Raweng.
Ngenang kaul ke sama Bit madah, penemuai sida seraban ngabas Raweng ngambi tau nemu tikas pengerai Bujang Berani ke nerima Midul George Cross ari Queen Elizebeth II nya.
“Kami nerima berita penusah Awang ari uchu iya pagi tu tadi lalu enggau lengkas datai kitu tengahari tu.
“Ngarapka penemuai kami ulih mantu mulaika pengerai Awang Raweng enggau lengkas,” ku iya.
Nitihka penerang ari Uchu iya, aki iya ditaban ari rumah sida di Nanga Skrang nuju Sepital Sri Aman nengah Jalai Lidong, Betong ensanus pengudah madahka diri pedis perut.
Sehari nya mega iya dibai ke Kuching ngena ambulan ngambi tau diperubat enggau silik ba SGH.
Ngelansa mimit pasal sejarah, Awang Raweng seiku soldadu maya nya suba nerima midul berani kedua tinggi ari serata menua komanwel, ‘George Cross’ ari Britain ba taun 1951.
Kenyau ari nya (dalam timpuh 60 taun ke udah) iya bisi 21 kali terebai ke London betemu enggau Queen Elizebeth II ngulu gempuru Batallion Pertama Rejimen Hutan Worceshire and Sherwood.
Midul George Cross nya nyadika basa pengudah iya betempuh ngelaban 50 iku komunis di kampung Kluang, Johor (1950) ke alai iya mega mujur ngidupka seiku soldadu British (Griff Hughes) ke bakal kena timbak.
Lebuh angkat mantu soldadu ke bakal, iya kena timbak ba pah enggau lengan.
Tajapia pengudah sejam betempuh, munsuh ngelarika diri.