S4S nadai kaul enggau pengawa politik, ku Peter

0

Fong, nengah CIA patut ngulihka sukung ngena chara diri lalu anang beambi ulih ari pemujur S4S

Dikarang Chris Bishop //

ANANG MALUT S4S ENGGAU POLITIK: Peter (dua kanan) disempulang kaban S4S ke bukai (ari kanan) Robert Liew, KC Tan enggau Johnny Voon bejaku ngagai pemberita, kemari.

ANANG MALUT S4S ENGGAU POLITIK: Peter (dua kanan) disempulang kaban S4S ke bukai (ari kanan) Robert Liew, KC Tan enggau Johnny Voon bejaku ngagai pemberita, kemari.

KUCHING: Peter John Jaban ngutuk ulah sekeda orang ti beambi ulih ari pemujur ‘Movement Sarawak for Sarawakians’ (S4S) ungkup pengawa politik diri.

Peter ke nyadi chairman Gempuru 722 kena 22 Julai 2015 tu tadi madah, S4S nadai kaul enggau pekara politik lalu ulah ke bansa nya tau ngelemi ‘Movement S4S’.

“Pemujur movement S4S bepelasarka pengawa ngenatai pinta enggau peneka rayat ngagai perintah lalu nadai kaul enggau pekara politik.

“Enti sekeda orang nguna nama S4S ungkup pengawa politik diri, pekara tu tau ngelemika S4S.

“Kitai ke nyadi peranak Sarawak enggai ngelakka pekara tu nyadi,” ku iya ba sebengkah aum pengarang berita kemari.

Kena 25 Ogos 2015 tu tadi, Kaban DAP ke dulu suba ke mega ADUN Pujut Fong Pau Teck madah S4S udah numbuhka sebengkah gempung ke dikumbai ‘Calon Independent Alliance’ (CIA) ti deka nyabung chalun maya pengawa bepilih tu ila.

Fong ba berita nya netap deka nyabung 42 iku chalun CIA ba penuduk menua pesisir enggau kandang mengeri.

Mantah jaku ke dipansut Fong, Peter minta CIA ngulihka sukung ngena chara sida empu lalu anang beambi ulih ari pemujur movement S4S.

“Aku mantah jaku ambu sida tu ketegal ‘Movement S4S’ nadai kaul enggau pekara politik ke alai kitai enda lantang ati pengudah sida beambi ulih ari pemujur pengawa nya.

“S4S ngarika semua peranak nengeri tu. Sida tau ngarika sebarang parti, ngundi parti peneka diri lalu nyadi ‘Suara Rayat’.

“Aku engka enda ulih nagang juluk raban CIA tang aku minta sida enda nguna nama S4S,” ku iya.

Gempuru 722 suba minta perintah ngizit 22 Julai nyadi hari diau sereta ngansak Sempekat Malaysia 1963 (MA63) dititih, dipebasa sereta dikemerat, tandu Peter.