KUCHING: Tikas penyeranta di Sarawak bisi nurun ngagai 0.9 peratus taun siti nyin tadi dibanding enggau 2.4 peratus taun 2012, ku Ketuai Perangkawan Malaysia Datuk Dr Abdul Rahman Hasan.
Ku iya,penatai pemisi ruang bilik ninting bulan di nengeri tu udah nambah tujuh peratus iya nya ari RM4,293 taun 2012 ngagai RM4,934 taun 2014.
“Penyampau ke nambah tu mega bela diasaika raban ti berumur baruh ari 40 taun ke alai puku rata penatai pemisi sida udah nambah 13.8 peratus ari RM1,552 (2012) ngagai RM2,044 (2014),” ku iya lebuh bejadi ‘Seminar Transformasi Statistik Bersama Komuniti’ ti diatur Opis Perangkaan Malaysia nengeri Sarawak ditu apin lama ke udah.
Ku Abdul Rahman, statistik mega mandangka penyampau orang ke nadai gawa di Sarawak nurun ngagai 3.1 peratus taun siti nyin tadi dibanding enggau 4.4 peratus dalam taun 2010.
Ku iya, dalam timpuh 40 taun ke udah, lebih ari setengah rayat di Sarawak seranta ke alai penyampau maya nya bisi 56.5 peratus.
Iya mega madah, statistik beguna amat ke menua nyapai status menua maju laban tetitiap polisi ti dikemansangka enda tau enda bepelasarka statistik ti bekualiti.
Sentang pengawa ngira tubuh, Abdul Rahman madahka opis nya deka ngira tubuh peranak menua Malaysia baru dalam taun 2020. — Bernama