Penyeranta ulih dipunas enti nembiak mujur besekula

0

KUCHING: Maktab Rendah Sains Mara (MRSM) udah nempa raban nembiak ke lebih agi ari menua pesisir nyulut ba pengawa besekula.

Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, nya mega nyaup perintah ngemunaska penyeranta di nengeri tu.

“Dikena nempa raban nembiak ke nyulut ba pengawa sekula, perintah sigi enda kakang ngeluar belanja ngambika tau nyendia palan ke lantang endur nembiak kitai ngulihka pelajar.

“Nengah chara nya kitai deka bisi raban orang ke ngembuan chukup pengelandik enggau penau ti diguna ba atur ngemansang menua.

“Opis menteri kitai kenyau suba sigi ngakun pekara tu tau mantu perintah ngemunas tikas penyeranta di nengeri tu,” ku iya.

Fatimah mansutka jaku tu ba Program Budi-Petronas MRSM Kuching ditu, kemari.

Iya nambah MRSM sereta palan pelajar tinggi bukai baka Universiti Teknologi Mara (UiTM) udah mayuh mantu raban nembiak ari menua pesisir enggau ke kurang penatai pemisi.

Ku iya nengah polisi pelajar, nembiak ari menua pesisir dikemerat nampung pelajar sida ngagai renggat universiti.

“Semina nengah chara tu kitai ulih ngemujur juluk ngurangka tikas penyeranta.

“Pengudah sida bulih pemandai, ngembuan pengelandik sereta penau, peluang gawa sigi bisi ungkup raban nembiak tu.

“Sida ulih mantu ekonomi ruang bilik,” ku iya ke nyadi menteri ngemata pekara pelajar di Sarawak.

Ngenang kaul ke sama, Fatimah pechaya raban nembiak ke belajar di MRSM nadai napi sebarang penanggul teulihka pemujur laban palan nya disikap enggau perengka dikena belajar ti chukup.

Ketegal nya mih ku iya, raban nembiak ari menua pesisir ke besekula mengkang kurang enti dibanding enggau kandang mengeri diambi belajar di MRSM.

Ba program nya kemari, Fatimah bisi nyuaka Skolarship ari Petronas ngagai 50 iku nembiak MRSM Kuching.

Nengah program nya mega Petronas deka meri skolarship ke sama ngagai 50 iku nembiak di MRSM Betong enggau 50 iku agi di MRSM Mukah.

Bela datai Menijer Besai (Operasyen) Malaysia LNG Petronas) Bita Ata, Direktor Mara Sarawak Megat Zakaria Mgt Ahmad, Kepala Pengajar MRSM Kuching Zuraida Zaidi.