Iya udah dikelala ngayanka pengamat deka munaska pengawa makai suap di nengeri tu, ku Masing
Dikarang Rengenyan Labang //
KUCHING: Menteri Pemansang Tanah Tan Sri Datuk Amar Dr James Jemut Masing bepenemu, Kepala Menteri Datuk Patinggi Tan Sri Adenan Satem mih orang ti patut dikangau sereta engkeman bejaku nyadi pengelicha ba aum besai anti makai suap.
“Datuk Patinggi Tan Sri Adenan endang pengelicha ti engkeman bendar bejaku ba aum besai anti makai suap nya. Iya endang pilih (pengatur aum besai) ti betul (nyadi pengelicha) ba atur pengawa tu.
“Iya udah ngayanka diri chukup begedika ulah makai suap lalu iya enda belalai madah, sapa enggau dini ulah nya (makai suap) nyadi,” ku iya madah nengah pesan jaku pandak (sms) ngagai pemberita Utusan Borneo.
Bepelasarka ripot surat kabar kemari, komitimen Kepala Menteri Datuk Patinggi Tan Sri Adenan Satem ti deka munaska ulah makai suap enggau pengawa betebangka kayu kampung enggau nadai pemendar udah meransang Transparency International (TI) ngangauka iya nyadi seiku ari pengelicha Plenari Utama ba Aum Besai Antirasuah Antarabangsa Ke- 16 (IACC) ti diatur ba Pusat Konvensyen Antarabangsa Putrajaya (PICC).
Aum besai nya kemari mujur dipenyadika Menteri ba Opis Menteri Besai Datuk Paul Low ti ngarika Menteri Besai Datuk Seri Najib Tun Razak.
Adenan deka bejaku ba Plenari Utama II pasal ‘Peace, Equality and Social Justice: Fighting corruption in development and investment beyond 2015’.
Berebak enggau tu Masing ngarapka semua nyengkaum pemesai opis perintah beratka lalau Adenan ti deka munaska ulah makai suap di menua tu.
“Aku ngarapka orang ti bepangkat tinggi nyengkaum pemesai opis perintah ngayanka komitmen ba lalau Kepala Menteri (Adenan). Iya endang amat serius.
“Kenyau ari iya (Adenan) megai kuasa, iya udah bebendar deka munaska ulah makai suap. Sebengkah chunto ti manah iya nya betebang tauka enchuri kayu ari kampung enggau nadai pemendar. Nya udah kelalu lama dilakka pia aja.
“Aku meri tabi ngagai pemerani enggau pengamat iya (Adenan) ti deka munaska ulah ti enda beradat tu,” ku iya.