KOTA SAMARAHAN: Seminar Penyelidikan Pendidikan Memartabatkan Bahasa Melayu (MBM) Renggat Antarabansa 2015 mujur matak 300 iku penyereta enggau 77 iku pejurai penemu ari univerisiti, Institut Pendidikan Guru enggau sekula di serata Malaysia enggau Indonesia.
Direktor Institut Pendidikan Guru Kampus Tun Abdul Razak (IPGTAR) Hamsiah Abdullah Masni madah, seminar nya sebengkah ari atur tauka chara baru kelimpah ari ngatur kursus dikena ngangkatka kualiti pengajar.
Seminar nya diatur berengkah kemari, 2 September nyentuk 4 September tu, ti berambaika leka jaku ‘Melestarikan Pendidikan Bahasa Melayu abad Ke-21’.
“Seminar tu ukai semina palan endur raban akademik betemu tang nyerakupka semua orang ti rindu tauka talukka jaku (BM) di serata Nusantara. Tu meh penyelai seminar kitai seharitu.
“Nyerumba seminar beberapa hari tu, penyereta ari Indonesia iya nya Universiti Tanjungpura Pontianak mega bisi mantaika keretas kereja sida, kelimpah ari penyereta ari menua Malaysia.
“Aku ngarapka pejurai penemu ulih bekunsika buag runding dikena ngangkatka pedagogi ti engkeman dalam BM,” ku iya dalam jaku pengelalu pengawa bejadika seminar nya ditu, kemari.
Seminar nya diatur IPGTAR begulai enggau Opis Menteri Pelajar Malaysia, Institut Pendidikan Guru Malaysia enggau Dewan Bahasa dan Pustaka (DBP) Cawangan Sarawak di Dewan Sri Samarahan IPGTAR ditu.
Seminar nya udah mujur dipenyadika Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah, ti ngarika Kepala Menteri Datuk Patinggi Tan Sri Adenan Satem.
Nambahka nya Hamsiah madah, kerejasama IPG enggau DBP Cawangan Sarawak patut dipajakka dikena ngangkatka jaku Melayu.
“Kerejasama tu deka meri peluang ngagai pengajar enggau ‘School Improvement Specialist Coaches’ (SISC) bulih mayuh pemanah tauka penguntung dikena ngangkatka kompetensi diri empu.
“Pekara tu senipak bendar enggau objektif seminar tu iya nya ngerapitka kaul enggau kerejasama akademik, entara pelajar enggau pelajar sereta entara lecturer enggau lecturer IPGK enggau pengajar sekula, pia mega pemesai SISC enggau lecturer ba IPTA,” ku iya.
Atur program bukai nyerumba seminar tu nyengkaum Persembahan Orkestra Tradisional IPGKTAR 2015 ti berambaika leka jaku ‘Gemalai Citra Rentak Tradisi’, ti diatur ba Dewan Sri Samarahan IPGTAR.