TITH ATUR TI DITETAP: Endur gawa patut likun nitihka penetap undang-undang.
KUCHING: Opis Pengelikun enggau Pengerai Pekereja (JKKP) Sarawak ensanus udah nyenyit ngabas palan ngaga rumah di Kuching dikena nentuka ‘Akta Kilang Dan Jentera (AKJ) 1967 sereta ‘Akta Keselamatan Dan Kesihatan Pekerjaan (AKKP) 1994’dititihka.
Operasyen ti betuaika Sapit Direktor (Operasyen) JKKP Sarawak, Mut Anak Sagai tu mega dipejalaika sereta di serata menua Sarawak, dikena nentuka kontrektor ngemeratka pengelikun enggau pengerai pekereja sereta mensia mayuh nya dititihka.
Operasyen sekali tu beratika pengawa ti dipejalai bekaul enggau ngena struktur sementara sereta endur ke tinggi ba palan ngaga rumah.
Nitihka jaku Direktor JKKP Sarawak Ir. Hj. Mohd Hatta Zakaria, opis nya neritka undang-undang enti sema pengawa ti digaga tetiap iku pekereja nya enda nitih undang-undang.
Ambika chunto ku iya, enti ditemu salah nengah Seksyen 15 AKKP, pengaji orang ke ngambi orang gawa ti enda nyendia endur gawa ke likun ngagai pengereja pengawa, tau diukum penalti nyentuk RM50,000 tauka dijil dua taun tauka kededua nya.
Lebuh nimbal pasal tanggungpengawa ti pejalaika opis nya ari bulan Januari nyentuk Julai 2015, urung 179 iti palan ngaga rumah udah diperesa di serata menua Sarawak.
“Endur ngaga rumah siti endur gawa dinamik lalu (risiko) iya enda sebaka. Sida kontrektor patut beratika pengelikun sereta pengerai pekereja ba endur sida gawa.
“Baka ke diatu, mayuh endar kes bebadi nyadi ba palan ngaga rumah di serata menua tu ketegal nadai struktur sementara.
“Nya disema baka ‘bom ke tau meletup barang maya’ semina nganti maya aja ti ngujungka pengereja pengawa nya bebadi sereta perengka guna rusak,” ku iya.
Mohd Hatta mega ngelalau pengereja pengawa ti digawa ba endur ke tinggi, nitihka atur pengelikun ti ditetapka.
“Opis tu deka beratika semua pengereja pengawa ke lebih agi di Sarawak ti gawa ba endur ke likun sereta bepengerai ninting hari,” ku iya.