KUCHING: Program kelas belajar bekuntau renggat kedua ke diatur ASADIA di Kampung Bayor, Balai Ringin udah berengkah dipejalaika sereta dipasuk 16 iku penyereta.
Tuai Rumah (TR) Solomon Achu ti nyadi Guro tauka pengajar kuntau madah, naka ke diatu iya udah ngajar 32 iku orang ti ngembuan pengerindu nampung main asal bansa Iban nengah program diatur ASADIA nya.
Berebak enggau tu iya ti bepeneleba bekuntau kenyau ari taun 1960 suba, ngelalau orang mayuh ti deka belajar bekuntau patut ngembuan pengeran enggau pengeliat ati nampung main asal nya.
“Aku ngarapka bala ke datai belajar tu mai ati ti keran sereta enda bepampang ati belajar bekuntau.
“Laban ukai nyamai deka ngambi penemu kuntau enti kitai enda liat ati. Kitai enda tau enda ngembuan pengeliat ati maya belajar bekuntau,” ku Solomon.
Kelimpah ari nya, Ketuai ASADIA Mabong Unggang mega madahka diri temegah ati ngagai sambut manah ari raban penyereta ti ngambi kelas belajar bekuntau nya, lebih agi ke diau ngelingi Balai Ringin.
Mabong ngarapka raban ti udah teulihka penemu ari kelas nya ulih terus mekuh sereta deka ngerembaika penemu nya ngagai orang bukai nengah pengawa ngatur kelas bekuntau.
“Aku arap bendar ngagai sida ti udah tembu tauka benung belajar bekuntau diatu ulih terus belajar sampaika landik tauka sikar lalu ulih nyadi Guro sereta nurunka penemu bekuntau ngagai nembiak rebak baru,” ku iya.
Berebak enggau tu mabong mega nesau orang ti bepenemu sereta bepengelandik bekuntau di nengeri tu ulih muka kelas belajar bekuntau ba endur diri awakka main asal nya ulih ditampung rebak baru dudi ila.
“Ajar nitihka penemu ti dikemisi anang nganti nyau udah pandai ba semua bansa kuntau baru deka ngajar orang bukai lalu enggau chara tu kitai ulih terus ngidupka main asal kitai Iban baka bekuntau tu,” ku Mabong.