Nengah tu mega raban pengajar ngembuan awak berundingka chara kreatif sereta inovatif ngenataika penemu ngagai raban nembiak
Dikarang Rengenyan Labang //
KOTA SAMARAHAN: Pengawa pemansik meri awak ngagai raban pengajar berundingka chara baru sereta engkeman dikena nyungkak penyulut dalam bidang pelajar.
Kepala Menteri Datuk Patinggi Tan Sri Adenan madah, pengajar patut ngembuan pengelandik nerang tauka nyalin penemu ti deka diberi ngagai nembiak.
Iya madahka pengajar jeman diatu ngena chara baru ti kreatif sereta inovatif napi penanggul nembiak rebak diatu.
“Nengah pengawa pemansik, seseiku pengajar nya deka ulih berundingka chara baru dikena meri penemu. Pengajar diatu mega patut kreatif sereta inovatif nerang tauka nyalin penemu ti deka diberi ngagai nembiak ngena chara ti enda sebaka sereta senang diperetika nembiak.
“Chara ti bebida dikena maya ngajar enggau belajar mayuh ditemu nengah pengawa pemansik lebih agi ti bekaul enggau pengulih pengawa pansik di sekula.
“Ngena pengawa pemansik aja kitai ulih nemu tauka meda nama penanggul ti ditapi kitai. Nengah pengawa pemansik, penemu inovasi ulih dikerembaika sereta disukung enggau fakta,” ku iya.
Adenan mansutka pekara nya dalam jaku iya ti dibacha Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah, ti ngarika iya bejadika Seminar Penyelidikan Pendidikan Memartabatkan Bahasa Melayu (MBM) Renggat Antarabansa 2015, ditu kemari.
Seminar ti ngena rambai jaku ‘Melestarikan Pendidikan Bahasa Melayu Abad Ke-21’ diatur IPG Kampus Tun Abdul Razak(IPGTAR) begulai enggau Institut Pengajian Guru Malaysia (IPGM), Opis Menteri Pelajar Malaysia enggau Dewan Bahasa dan Pustaka Cawangan Sarawak ba Dewan Sri Samarahan IPGTAR ditu.
Ku iya, dikena betapi enggau segang pemansang dunya, teori lama engka agi relevan tang pemar baru diatu deka ke kitai ngiga chara baru ti setipak enggau pemansang diatu.
Pengawa pemansik ukai semina meri kitai saut ngagai sekeda tanya tang mega ulih mantu kitai lebih mereti ngagai nama kebuah pekara nya nyadi, ku iya.
“Aku arap bendar budaya pengawa pemansik ulih dikemeran sereta dikemeratka tumu agi ba raban nembiak enggau pengajar baka ti udah berengkah dipejalaika ba nembiak Pom Enam di semua sekula sekondari di Malaysia.
“Ba IPG empu, pengajar pelatih mega diajar ngena kursus pemansik iya nya pansik pengulih. Tu sebengkah ari chara kitai ngemeranka pengawa pemansik dalam pelajar lebuh sida di sekula ila,” ku iya.
Ngenang pasal seminar pemansik nya, Adenan madahka seminar nya sebengkah ari polisi Memertabatka Bahasa Melayu (MBM) ti dipasuk dalam Pelin Pemansang Pelajar Malaysia (2012 – 2035).
Ngarapka seminar tu nyadi kereban dikena ngulihka penemu enggau pengelandik dalam mayuh macham bidang penemu, ku iya.
“Aku bepenemu seminar tu ulih nyadi kelai kualiti enggau kuantiti teori pedagogi ti dikemeran sereta dikemerat ulih dikemanahka agi sereta dikerembaika entara pengajar lebih agiraban pengajar ti beratka Bahasa Melayu nyadi jaku rasmi menua enggau dikena dalam sistem pelajar bansa,” ku iya.
Sama bisi datai ngagai pengerami bejadika seminar nya kemari Kaban Parlimen Kota Samarahan Rubiah Wang enggau Direktor IPGTAR, Hamsiah Abdullah Masni sereta kebukai.