Kontrektor diansak nembuka RTP sebedau ujung taun tu

0

DALAT: Kaban Kunsil Nengeri (ADUN) Dalat, Datuk Fatimah Abdullah ngansak kontrektor nembuka pengawa ari baruh Projek Transformasyen Menua Pesisir (RTP) nyerumba ujung taun tu.

Lebuh ke bejaku maya betemu enggau Opis Kereja Raya sereta Opis Parit enggau Tali Ai (JPS) ba Opis Pelilih Mit Dalat ensanus, Fatimah madahka diri enda puas ati laban bisi sekeda projek gagal enda ditembu nitih timpuh ke udah ditetapka.

“Sesapa ti nerima agih belanja, kena mih nya nembuka projek ngambi pulaika pemaik ngagai rayat.

“Aku dekaka ejensi ti bekaul bejalaika pengawa enggau jampat ngambika semua projek nya ulih ditembu nitihka timpuh ti udah ditetap,” ku iya.

Ku iya, projek ari baruh RTP nya projek ti ulih ditembuka dalam timpuh setaun laban ungkup belanja nya  enda ulih dibai ngagai taun baru.

Bisi 13 iti projek RTP di Dalat ari baruh kemata Opis Kereja Raya.

Sekeda projek ke betapi penanggul nyengkaum ngelekatka atap ba  Pasar Dalat, ngemesaika jalai alun di Kg Medong Hulu ke Kg Medong tujuh buah rumah di Kg Medong Hilir sereta nyambung ai ngagai 10 buah rumah di Kg Nenas, Sungai Kut Tengah.

Nitihka ripot ti bantaika pengari ari Opis Kereja Raya, atap di Pasar Dalat ke beungkus urung RM186,166 patut ditembu kena 21 November taun tu.

Taja pia, naka ke diatu nadai kelai projek nya udah tauka benung dipejalaika.

Ungkup projek jalai alai ti nyambung ngagai Kg Medong Hulu enggau Medong Hilir, nya begunaka ungkus RM49,925.80, lalu projek ngemanahka jalai di Kg Medong Seberang, beungkus RM297,412.50.

Projeknya udah diserah ngagai kontrektor kena 30 Jun sereta disadang tembu kena 29 September.

Taja pia, semua projek nya udah mujur dipejalai urung 10 peratus aja.

Berebak enggau nya, ungkup projek nyambung ai ngagai tujuh buah rumah di Kg Medong Hilir ti dianggarka beungkus RM377,378.46 enggau 10 unit rumah di Kg Nenas, Sungai kut Tengah beungkus RM209,769.90.

Pengawa nyerahka projek nya kontraktor ke dipilih udah diatur kena 30 Jun lalu disadang tembu kena 29 Oktober taun baru.

Naka ke diatu, semina 10 peratus ari projek  nya udah mujur ditembuka.

Ungkup projek jalai simen di Balai Raya Sungai Kut Tengah ke beungkus urung RM100,000 mengkang digaga tinda lalu projek ngaga gelanggang futsal Kg Hulu, Dalat ke beungkus RM150,000 benung nganti palan nya ditetapka.

Ku iya, enti sema lalu nadai pemansang nyentuk ke ujung bulan September tu, semua kontrektor nya deka dikangauka.

Kelimpah ari nya,bisi tujuh projek ari baruh kemata JPS ke alai empat iti projek nya udah mujur ditembuka tumu ari timpuh ditetap, dua iti projek nyauka tembu lalu siti agi projek bedau berengkah digaga.