Ngena ungkus belanja RM2 juta, palan endur nerenak benih koko nya deka tampak agi dikelala di nengeri tu
BETUL JAGA!: Uggah meratika pun koko ke diintu di stesyen nya ba penemuai kereja iya bedau lama tu tadi.
KUCHING: Penyikap perengka pemansik di Stesyen Pemansik Opis Koko Malaysia (LKM) Lundu deka dikemanah nengah Langgur Pemansang Malaysia Lumpar Ke-11 (RMK11).
Ditumbuh ba taun 2009 mungkur tanah pemesai 500 ikar, stesyen tu bejalaika semua pengawa pansik enggau pemansang (R&D) lebih agi sentang tuju industri koko.
Dikena ngemujur juluk nya, Menijar Dr Ahmad Kamil Mohd Jaafar madah, penyampau RM2 juta diguna kena bejalaika perambu ti udah ditusun.
Entara perambu iya nya meresi kandang endur baru pemesai 170 ikar, ngemanah jalai kebun, ngaga parit sereta ban, ngaga pintu ai, nyukat tanah ngambi tau sah diempu ba pemesai 500 ikar enggau pengawa ngaga ai baruh tanah ungkup sistem fertigasyen palan endur nerenak benih koko.
Program pemansang bukai nyengkaum ngangkatka tikas pengelikun aset perintah ngambika enda dichuri, nyendia seiti tangki diesel, nanam utai tumbuh ti tau ngelindung koko, nyendia perengka bekebun sereta dua iti pam ai, masang lampu jalai, ngaga palan rekreasyen, ngaga stor baja enggau ngaji orang gawa.
“Maya ditumbuh suba perengka infrastruktur di stesyen tu mengkang kurang sereta mengkang begunaka perengka tambah bukai ngambi tau nyadi palan pemansik koko ti dikelala di Sarawak.
“Nengah RMK-10 enggau RMK-11, stesyen pemansik tu deka bisi opis kediri empu, mini lab, palan nerenak, rumah endur diau ungkup orang gawa, perengka proses igi koko sereta jalai kebun ke manah agi.
“Pengudah disikap ngena semua perengka tu, stesyen pemansik koko di Lundu tu deka nyadi sebengkah stesyen pemansik ti dikelala di nengeri tu,” ku iya ba seiti licha ke diadu di stesyen nya bedau lama tu tadi rambau penemuai kereja Menteri Kebun Dandang Besai enggau Komoditi Datuk Amar Douglas Uggah Embas.
Dr. Ahmad nambah, setipak enggau pengawa numbuhka stesyen nya, pansik ke diadu dikearap ulih nempa teknologi baru kelimpah ngemanah teknologi ti udah bisi.
Program pansik koko mega dikearap ulih ngemansang inovasi koko sereta ngangkatka asil.
Kelimpah ari nya stesyen mega mekal paung koko ngagai orang bekebun koko nengah Program Pemansang Koko.
“Naka ke diatu, stesyen ulih mansutka 40,000 paung koko dalam timpuh setaun ke alai kitai begunaka 200,000 paung koko ungkup kebun pemesai 500 ikar,” ku iya.
ENDUR NERENAK: Palan endur nerenak paung koko di Stesyen Pemansik Koko Lundu.