DALAT: Bayar insentif pengawa ngeluarka getah enda dipejalaika ngagai raban bekebun dandang mit laban rega getah SMR 20 FOB agi bedau datai ba ikas intensif nya taun tu, ku Menteri Kebun Dandang Besai enggau Komoditi, Datuk Amar Douglas Uggah.
Ku iya, kebuah pia laban rega getah SMR 20 FOB agi bedau labuh di baruh RM4.60, iya nya bedau datai ba ikas ngatifka IPG ke lama.
“Kitai ulih meri IPG ngagai raban bekebun getah dandang mit nya, tang nyentukka diatu rega getah SMR bedau labuh di baruh ikas RM4.60,” ku iya ngagai raban pemerita rambau dirandau pengudah bejadika Pesta Balau Dalat ditu kemari.
Berebak enggau nya, iya mega bela dipinta meri penemu bekaul enggau peminta Serakup Nasional Raban Bekebun Dandang Mit Malaysia ngambika IPG dibayar secara tunggakan kenyau ari Januari taun tu berindik ari rega getah ke labuh pemaruh RM4.90 pengelama enam bulan tau tu.
Ku iya, ikas intensif nya udah ditikila ngagai RM5.10 sekilogram berengkah diterit pun bulan tu tadi pengudah kabinet ngemendarka pengawa meresa iya kena 26 Ogos tu suba.
Nitih ku iya, insentif ungkup getah buku mega ditikika ngagai RM2.00 sekilogram.
Kelimpah ari nya, iya mega ditanya bekaul enggau biodisel B10 ti dipelabaka deka dilanjar bulan seiti tu ila.
“Iya agi diinsur dataika Kabinet nyapai jaku pemutus bekaul enggau pekara nya,” ku terang Uggah.
Tu beduduk ari asil pejalai dua Menteri Indonesia apin lama ke udah berandauka pekara bekaul enggau kerejasama entara Malaysia enggau Indonesia ba kala rega minyak sawit ti baruh iya ke diatu, ku iya.
Kebuah pia laban kededua menua tu ngeluarka 85 peratus minyak sawit sereta perintah patut nentuka penggunaan minyak sawit ulih ditambah ba renggat domestik.
“Dikena nambahka penggunaan minyak sawit ba renggat domestik, Menteri Besai minta kitai ngambika bejalaika pengawa bekenaka B1o tu,” ku iya.
Bela bisi datai nguli karnival nya kemari iya nya Menteri Pemansang Orang Indu, Diri Sebilik enggau Mensia Mayuh ke mega nyadi Kaban Kunsil Nengeri (ADUN) Dalat, Datuk Fatimah Abdullah, Datuk Syvester Entri Muran, ADUN Balingian, Yusinos Balo sereta raban ke bukai.