Festival Kraf Sarawak peluang endur nyual, ngelakuka asil pengelandik jari

0

Dikarang Chris Bishop //

DIGAGA IYA EMPU: Lumat mandangka sekeda barang kraf ke dijual ba festival nya.

DIGAGA IYA EMPU: Lumat mandangka sekeda barang kraf ke dijual ba festival nya.

KUCHING: Pengawa perintah ngatur Festival Kraf Sarawak enggau festival bukai ke bekaul nyata mai penguntung ngagai orang dagang kraf di menua tu.

Ketegal pemanah atur nya, orang dagang kraf di serata Sarawak sigi enda deka ngelepaska awak ngelaku asil pengelandik jari diri lalu nengah Festival Kraf Sarawak 2015 ke benung diadu di Waterfront Kuching diatu, lalu mensia mayuh diperansang datai nyaup industri kraf.

Baka ke suah, SLDC Handicraft sigi deka enggau mandang seraya ke nyual asil pengelandik jari kitai bansa (Iban).

Asil pengelandik jari baka ke tanggui, timpa, chapan, raga, bakul, tikai, ajat  enggau ke bukai sigi seruran nyadi pilih pemeli.

“Kami sigi enda muai peluang tu ketegal asil pengelandik jari sigi seruran matak ati mensia mayuh baikka nya orang ari dalam menua tauka orang ke datai ari menua bukai.

“Taja pan enda nyengala mayuh penguntung tang bisi mih dibai pulai lalu kitai sigi nyukung festival kraf ke bisi diadu,’ku Lumat anak Lebung (SLDC Handicraft) ke penatai asal ari Kampung Lebur, Serian.

Lumat, 55, ke sigi ngembuan pengerindu ba pengelandik jari kenyau ari mit madah, semua barang ke dijual sigi digaga iya empu nengah saup laki enggau bala anak.

Ku iya sida sebilik sama bela begigaka bemban, mulung, buluh ba sebelah kampung sereta mega nylon (dibeli) ngambi tau dianyam nyadi mayuh macham barang kraf.

Rega barang kraf ke dijual Lumat berengkah ari RM10 nyentuk ngagai RM120.

Festival Kraf Sarawak 2015 ti nungkatka rambai jaku ‘Beli Barangan Malaysia’ dipenyadi Menteri Dagang Temuai Datuk Amar Abang Johari Tun Openg kemari.

Festival diadu berengkah 18 nyentuk ngagai 27 September 2015 lalu serak tu mantaika barang kraf ke digaga ari utai kampung, tekstil, logam, asil tanah pia mega kraf ke bukai.

Bisi 92 iku orang dagang kraf ari Sarawak, Sabah enggau Semenanjung Malaysia sama bela bejual barang kraf diri.

Kelimpah ari nya, demonstrasyen (kraf) gendang, sangkar burung, luyang enggau lesung ari Sarawak bisi mega dipandang ngagai mensia mayuh.

Pengawa mandangka main asal enggau tanda mega bisi diadu rambau festival.

Bansal kraf dibuka berengkah jam 10 pagi-10 malam lalu ba Hari Enam enggau Minggu, bansal deka dibuka nyentuk jam 11 malam.