Semengat nya patut bisi ba genap iku peranak menua tu ngambika atur pemansang ulih dikemujur
Dikarang Chris Bishop //
SERIAN: Sapit Menteri Besai Datuk Seri Dr Zahid Hamidi temegah enggau pengangkun rayat Sarawak ti deka begulai enggau rayat Semenanjung Malaysia sereta ngakun Malaysia nyadi menua diri.
Ku Zahid semengat ke baka nya patut bisi ba genap iku peranak menua tu ngambi atur pemansang ke ditusun ulih dikemujur.
Berindik enggau nya iya ke bedau manggai dua bulan mangku pengawa sapit menteri besai deka chakah nyaup peranak nengeri tu.
“Kena 29 September tu baru genap dua bulan aku nyadi sapit menteri besai lalu dalam timpuh kurang dua bulan tu udah dua kali aku nemuai serayaka gawa kitu ketegal deka mantu rayat Sarawak,”ku iya.
Zahid mansutka jaku tu ba Program Ketuai Begulai enggau Rayat di Kampung Terbat Leban, Serian ditu kemari.
Zahid ke mega Menteri Dalam Menua nambah diri udah ngelala Sarawak enggau silik asil kaul manah begulai enggau Menteri Pengereja Pengawa ke mega Kaban Parlimen Serian Dato Sri Richard Riot Jaem ti bisi datai ngulu program sehari nya.
Ku iya rayat di Serian chukup untung ketegal bisi ketuai baka Riot ti suah mai isu rayat nengeri tu kelebih agi bansa Bidayuh ngagai renggat Perintah Besai
“Perintah Besai pechaya rayat Malaysia kelebih agi rayat nengeri tu deka bela besaup ngemansang menua tu.
“Berindik enggau nya rayat pupu bansa ke nguan menua tu patut berakup lalu nulak semua bida enggau pangan diri,” ku iya.
Ngenang program sehari nya, Zahid madah sida datai ke menua pesisir ketegal keran deka mantu rayat ke nguwan menua pesisir kelebih agi ba atur nyendia perengka guna.
Kelimpah ari nya ku iya perintah mega deka nentuka peranak ditu diberi servis pengerai enggau peluang belajar ke chukup.
Bela datai Menteri Pemansang Infrastruktur enggau Penyambung Dato Sri Michael Manyin, Menteri Pengawa Berumah Datuk Amar Abang Johari Tun Openg, ADUN kedup Micheal Ben enggau pemesai ke bukai.