SIBU: Pengawa bepasangka kamera lalai tauka CCTV ba sekeda palan udah mujur nyaup raban polis mutarka 30 peratus tauka 149 iti kes jai ke bisi nyadi ba sitak tu.
Ketuai Polis Sibu ACP Mohd Kamal Kordi madah, iya perchaya penyampau tu ulih ditambah agi nengah kerejasama ti tegut enggau piak ti bekaul.
Ku iya, naka 25 September tu tadi, bisi 495 iti kes tauka 71.22 peratus udah diputarka.
“Nengah sempekat pemereti ati (Mou) ba Safe Cam Project entara piak polis enggau orang dagang menua tu, pengawa ngemunaska penyalah muntang agi diatur udah tu,” pia ku iya madah ngagai pengarang berita.
Iya mantaika pekara tu sepengudah pengerami Makai Lemai Ninting Taun Gerempung Hotel Sitak Tengah 2015 ditu, malam kilah ensana.
Pengerami tu bela digulu chairman gerempung nya Johnny Wong.
Nambahka nya ku Kamal, diatu udah mayuh hotel di Sibu ngelekatka CCTV ba hotel sida.
“Rikod ke diulih ba CCTV beguna bendar ngagai piak polis dikena mutarka kes nyengkaum ba hotel.
“Piak polis enggau naka ulih bekempit enggau sida tu ngambika sida enda bepenanggul maya polis minta rikod ari CCTV hotel sida.
“Kitai mega ngarapka orang ke beempu hotel anang laun madah ngagai kitai nyema bisi nemu kes tauka penyalah ke nyadi ba hotel sida,” ku iya madah sambil madah randau polis begulai enggau piak hotel udah diatur empai lama tu tadi.
Dulu agi ari tu, Kamal maya ke bejaku ba pengerami nya minta saup ari orang ke beempu hotel bela ngemunaska penyalah ba sitak tu.
Ku iya, kerejasama ti rat entara kededua piak ngelantangka agi pengawa ngemunaska penyalah diatur.
Wong ba jaku iya meri besai terima kasih ngagai polis laban ke udah bekerejasama enggau sida ngelawa tuju ke sebaka.
Iya mega muji pengawa Opis Kunsil Sibu (SMC) laban mujur ngatur pengawa matau tikas hotel nyengkaum hotel mit berengkah ari taun 2007.
“Tu ukai semina ngangkatka agi tikas pengelikun tang mega deka nentuka tikas servis enggau pemeresi ba hotel,” pia ku iya sambil madah gerempung sida naka ke diatu bisi 64 iku raban.