Nengah INSTEP PETRONAS mujur nempa pengereja pengawa ti landik dalam bidang minyak enggau gis
Dikarang Rengenyan Labang //
UDAH MUJUR: Jabu nyuaka skrol ngagai seiku ari 579 graduate Sarawak seraya diperatika Raiha (kiba) enggau bala bukai.
KUCHING: Perintah nengeri minta PETRONAS terus beranakka puku dalam pelajar enggau pemansang modal mensia dikena nambahka penyampau pengereja pengawa ti bepelajar enggau bepengelandik di Sarawak.
Sapit Kepala Menteri Datuk Patinggi Tan Sri Alfred Jabu Numpang, madahka diri temegah ati laban PETRONAS udah nempa kerejasama enggau perintah nengeri nyendiaka program pelajar, pemansang pengelandik teknikal enggau nambahka peluang gawa ngagai raban graduate.
Berindik ari nya iya minta PETRONAS nengah Institut Teknologi Petroleum PETRONAS (INSTEP) ngelatih mayuh agi peranak Sarawak dalam bidang minyak enggau gis.
“Kitai ngarapka PETRONAS terus bejalaika pengawa manah tu baka ngelatih mayuh agi anak ari Sarawak, enti ulih beri mayuh agi peluang ngagai anak ari menua pesisir dilatih.
“Kebuah pia, laban semina nengah pelajar tauka pengelandik aja ti ulih ngubah pendiau pengidup peranak menua pesisir. Nya kebuah kitai suah meransang apai indai menua pesisir beratka pelajar anak.
“Aku arap endar kerejasama PETRONAS enggau perintah nengah mayuh macham program ba institusyen pengelandik baka di Lundu tu ke udah dipenyadika Kepala Menteri kena bulan Ogos tu tadi, nyadi pekara ti chukup manah,” ku iya ti ti Menteri Pemansang Menua Pesisir.
Jabu ti mega Menteri Betanam Betupi Moden mansutka jaku tu lebuh bejadi Majlis Konvokesyen INSTEP Ke-17 ti diatur PETRONAS ba BCCK ditu, kemari.
Ba pengerami konvokesyen nya Jabu diberi basa nyuaka skrol ngagai raban graduate INSTEP ti ngambi tiga bengkah program iya nya Bridging Programmes, Professional Development Programmes enggau Assessment and Certification Service ba palan pematih bekelas dunya PETRONAS di Kertih, Terengganu.
Kelimpah ari nya, Ketuai Mandal Presiden Gerup Pengatur Pengereja Pengawa PETRONAS, Datuk Raiha Azni Abd Rahman madahka PETRONAS deka majak komited bejalaika pengawa ngelatih, taja pan bisi risiko ketegal rega minyak dunya.
Raiha madahka sida bisi ngelangkar pelin sistematik dalam pelajar sereta pemansang modal mensia dikena ngenegapka Malaysia ba renggat pemadu tinggi dalam bidang pelajar minyak enggau gis sereta Hub Pelajar di menua tu.
“PETRONAS deka ngemajakka pengawa ngemansangka kapasiti dikena nyukupka pengereja pengawa ti landik sereta pandai ba sektor petroleum di Malaysia.
“INSTEP deka majak ngulu pengawa mansutka pengereja pengawa ti landik dalam bidang minyak enggau gis di menua tu,” ku Raiha.