Main asal tu patut ditampung bala nembiak laban iya ngembuan penyelai sereta nunjukka identiti bansa Iban
Dikarang Judan Bungap //
SIBU: Kuntau sebengkah main asal ke patut bendar diajar ngagai nembiak rebak baru ba tuju ngetanka pengelebih enggau penyelai tauka seiti ari identiti bansa Iban.
Kaunselor Dauglas Duli Sanggau madah, rebak diatu patut ngembuan pengerindu deka belajarka main asal bansa diri sereta temegah ke pekara nya.
“Kuntau sebengkah ari main asal kitai Iban kelimpah ari pantun, beramban, ngajat tauka main asal ke bukai ti patut ditan lalu nembiak rebak baru dikearapka anang jugau belajar sereta nampung pengawa nya,” pia ku iya madah.
Iya mantaika jaku nya maya bejadika sebengkah pengawa tamat kuntau ba Jalai Oya Lama ditu, ujung Minggu seiti tu tadi.
Pengawa sehari nya kelai 12 iku nembiak ke diajar Guro Nyawai Tinggi enggau Guro Siang Maggi udah tembu belajar kuntau.
Ku Duli madah, bansa Iban patut bechuntoka bansa bukai baka bansa China enggau Melayu ti ransing ngetanka main asal sida.
Iya madah, taja maya hari tu tebal agi rebak baru kisuk enggau pengawa besari-sari tang sida patut landik nyelepak hari belajarka main asal bansa diri.
“Kitai bela nemu bansa bukai mengkang ngetanka main asal sida nyengkaum bala nembiak taja bela kisuk enggau pengawa diri empu.
“Pekara tu patut ditunda kitai tang anang beserah ngagai pangan diri.
“Ambika chunto bala apai indai tau nganjung anak sida belajarka main asal baka belajar kuntau ke dipeda kitai sehari tu (ensana),” ku iya madahka baru.
Nambahka nya ku Duli, sida ke udah tembu belajar kuntau mega anang sanggu mai bala bakih bukai bela belajar kuntau.
Iya madah, ari ke bebai pangan diri baka nya tau nambahka agi penyampau nembiak rebak baru landik bekuntau.