Dikarang Chris Bishop //
LUNDU: Kepala Menteri Datuk Patinggi Tan Sri Adenan Satem nyemetak madahka pelilih Lundu enggau Sematan deka digagaka ‘waterfront’.
Bejaku ba pengerami Jubli Emas 50 taun SMK Lundu kemari, iya pechaya pengawa ngaga waterfront ba kededua pelilih mit nya disadang ulih ngangkatka industri dagang temuai ba kandang endur ke ngelingi.
“Lundu bisi tebing sungai lalu pia mega Sematan bisi tebing tasik, kededua pelilih mit tu patut digagaka waterfront.
“Gaya rampa menua ke dikembuan Lundu nyentuk ngagai Tanjung Datu iya ke pemadu manah di Nengeri Sarawak.
“Chukup manah, kitai bisi ai ti chiru, bisi bukit sereta pulau ke manah,” ku iya.
Iya nambah pemaik rampa menua ke dikembuan Lundu enggau kandang endur ngelingi sigi enda ulih dilaban lalu ketegal nya perintah keran nyendia mayuh perengka guna.
Ku iya Projek Pan Borneo ke beungkus RM15-20 biliun diserata Sarawak nyengkaum pengawa nyendia atur penyambung ari Tanjung Datu-Sematan-Pueh-Bau.
“Waterfront tu ila ukai semina ungkup peranak ke ke nguan pelilih tu tang mega ungkup temuai ari Kuching.
“Kitai keran deka ngangkat industri dagang temuai ditu,” ku iya.