KUCHING: Penyulut belajar ukai semina disukat tauka ditentuka ngena setipikit aja tang iya (penyulut) patut ulih dikena besemekih sereta ngemansangka rayat enggau menua tu, ku Menteri Kereja Raya Datuk Seri Fadillah Yusof.
“Penyulut ke dijapai kitai sekalika dalam akademik tauka bidang pengelandik patut ulih mai penguntung ngagai semua orang sereta mai pemansang ngagai menua. Tu meh patut nyadi juluk kitai,” ku iya.
Fadillah ti mega nyadi Kaban Parlimen Petra Jaya mansutka pekara nya lebuh bejadika Program Kembara Jejak Realiti 2015 ‘KEJAR 15’ ti diatur Biro Pendidikan Petra Jaya ba Akademi Binaan Malaysia (ABM) Wilayah Sarawak ditu, kemari.
Program nya diatur begulai enggau Felo Muda Dakwah YADIM, ABM Wilayah Sarawak, Yayasan Dakwah Islamiah Malaysia (YADIM) Zon Sarawak, NEXGEN UNIMAS, Ikon Siswa Kenyalang enggau Sahabat YADIM UNIMAS.
Nambahka nya Fadillah ngelalau nembiak ngambika milih bidang pengelandik nyema enda mujur dalam bidang akademik.
“Nyema enda ulih nampung pelajar ngagai renggat universiti kita tau milih bidang pengelandik laban nya (bidang pengelandik) mega nyadi penentu pengidup jemah ila.
“Seiti agi maya ngiga penemu patut milih bidang ti dikerindu diri, laban nya mega ulih ngemuntang kita begigaka pengawa dudi hari,” ku iya.
Program Kembara Jejak Realiti 2015 dipasuk 183 pesereta ari tujub buah sekula sekondari ba sitak Parlimen Petra Jaya, sereta 28 iku fasilitator.
Raban ke diselinting program tu iya nya raban nembiak bansa Melayu Pom 4 ti bisi penanggul disiplin enggau Akademik.
Tuju program iya nya dikena nempa pemanah ulah enggau ngajar raban biak ngambika nyadi mensia ke menyana, kelimpah meri penerang pasal napi pemar kemaya hari tu.
Ba program nya bala nembiak bisi bejuaraika tiga modul iya nya Ta’aruf & Latihan Dalam Kumpulan, Isu-isu Semasa dan Graf KehidupanKu enggau My Will – Kata-Kata Cinta sereta licha Hala Tuju Anda – ABM Wilayah Sarawak.
Bisi datai ba pengerami nya Sekretari Politik Kementeri Kerja Raya ti mega Chairman Biro Pendidikan Petra Jaya Fazzruddin Abdul Rahman enggau kebukai.