KUCHING: Chairman Parti Keadilan Rakyat (PKR) Sarawak Baru Bian sekali agi netapka parti sigi dalam Pakatan Harapan di Sarawak.
Netapka pekara nya nengah seiti surat penerang berita kemari, Baru madah PKR Nengeri sigi konsisten nitih pemutus PKR renggat besai ti nyereta gempung Pakatan Harapan begulai enggau DAP sereta AMANAH.
“Ketuai renggat menua kitai udah netapka pemutus PKR, DAP enggau AMANAH numbuhka gempung baru ke dikumbai Pakatan Harapan.
“Aku udah nya netapka PKR Sarawak mega dalam Pakatan Harapan, nitihka pemutus gempung renggat menua, reti nya PKR Sarawak sebagi ari Pakatan Harapan Sarawak,” ku iya.
Baru mansutka jaku nya nimbal seiti aum pengarang berita ke diadu DAP enggau AMANAH ti enda disereta PKR Sarawak ensanus, ke alai iya sekali agi nandu jaku ke dipansutka iya kena 25 September tu tadi.
Ba jaku iya rambau nya, Baru ke mega Kaban Kunsil Nengeri (ADUN) Ba’kelalan madah, PKR Sarawak sigi deka nitih pemutus ketuai PKR renggat menua ke alai sida mega nadai nanggul ngadu kerejasama enggau DAP (Sarawak).
Ku Baru, PKR Sarawak nemu PAS bisi dibai nyereta Pakatan Harapan tang sida enda nyanggup lalu iya pechaya PAS Sarawak pan deka nitih pemutus ketuai (PAS) renggat menua nya.
“Sekali agi aku netap PKR Sarawak nadai penanggul ngaga kerejasama enggau parti bukai dalam gempung baru tu, nyengkaum DAP.
“Kitai seruran konsisten ba atur netapka pemutus, diatu gempung lama Pakatan Rakyat udah nadai agi tang kitai mengkang ngaga kaul enggau PAS.
“DAP merara diri ari Pakatan Rakyat lalu mutuska kaul enggau PKR sereta PAS. Pekara tu bisi ngeruga kaul Pakatan Harapan Sarawak,” ku iya.
Baru nambah diatu penyakal udah bisi gempung baru lalu patut beratka tuju ti ditetap lalu badu betalatka isu PAS agi ti nadai dalam Pakatan Harapan.
Ngenang kaul ke sama, Baru madahka parti dalam gempung tu benung nusun sempekat enggau pekara ke patut ditetap dalam Pakatan Harapan.
Iya pechaya enti semua pekara udah dipesetuju, PKR Sarawak deka berandauka sentang agih penuduk (pengawa bepilih) enggau DAP sereta AMANAH.