KUCHING: Hope Place, sebuah organisasyen ti mantu orang tusah, udah meri penemuai basa ngagai Menteri Pemansang Rama Tan Sri William Mawan Ikom enggau Menteri Pengintu Pengelantang Orang Indu enggau Pemansang Ruang Bilik, Datuk Fatimah Abdullah sereta nyuaka ‘t-shirts of Affin Hwang Capital’s Charity Run ‘Run For Hope’ ba opis kededua menteri nya ensanus.
Penengkebang Hope, Kelvin Wan nengah publisiti ti dikeluarka ensanus madahka Affin Hwang Capital deka ngatur pengawa belanda dikena ngulihka belanja lalu mantu Hope Place ngambika ulih nyaup komuniti ti begunaka bantu.
Pengawa belanda nya diatur sehari tu (4 Okt) pukul 6 sereta diatur ba Opis Gerempung Gerija- Gerija, sereta udah matak penatai 1,800 iku pelanda. Pengawa belanda dibagi ngagai tiga kategori iya nya 3KM Anak enggau Apai Indai, 6KM Orang Besai Tuai enggau 3KM VIP.
Affin Hwang Capital dipelaba deka nyuaka belanja ngagai ba atur nutup pengawa belanda nya.
Hope Place sebuah gerempung ukai dikuasa perintah (NGO) ti nyaup orang ke kurang benasit sereta tusah seraya nyuaka bantu pemakao baka beras, minyak makai, gula, garam,ruti enggau mi bungkus.
Tebal agi ruang bilik tauka orang ngatiak diri tu enda chukup belanja dikena ngidup kediri sepemanjai bulan, lalu tebal agi sida berasai lantang seput pengudah nerima bantu ke diberi ngagai sida.
Ungkup ruang bilik ti bisi anak ke timpang pendiau tauka orang besai tuai, sida mega bisi nyendiaka bantu tepung tusu, Oat enggau lampin.
Hope Place bejalaika pengawa meri bantu dua bulan sekali laban mayuh nama ke bisi dalam rintai penerima sida. Naka ke diatu sida udah mantu 127 ruang bilik.
Penereang silik sentang chara ngulihka bantu tau ditanya nengah lumur (013-567 2775) ari pukul 9 pagi nyentuk 12 malam, Hari Satu nyentuk Hari Lima.