BINTULU: Bisi 12 buah tim ari pengkalan ari serata menua Malaysia nyereta Pekit Futsal (Asean Port Association) APA 2015 di Gelanggang Futsal Kelab Kidurong Bintulu (KKB) ke belabuh Hari Enam lalu ambis kemari (Hari Minggu).
Pekit tiga taun seklai nya diatur Kaunsil Pengkalan Bintulu (LPB) enggau Bintulu Port Holdings Bhd lalu bisi dipasuk LPB, Bintulu Port Sdn Bhd (BPSB), Kaunsil Pengkalan Kuching, Kaunsil Pengkalan Kuantan, Kaunsil Pengkalan Kelang, Kaunsil Pengkalan Johor, Kuantan Port Consortium Sdn Bhd, Westport Malaysia Sdn Bhd, Sabah Port Sdn Bhd, Penang Port Sdn Bhd, Northport Sdn Bhd enggau Kaunsil Pengkalan Rajang.
Pekit tu dipenyadika Chairman Komiti Teknikal Pekit ke mega nyadi Menija Pengelikun enggau Pengerara Api LPB, Awang Jahmari Awang Junaidi.
Kaban komiti pekit, Bujang Han madah, tuju pekit tu dikena milih pemain ngarika Malaysia ba Pekit Futsal Asean Port Meet di Vietnam taun baru nyin ila.
“Taun tu pekit ke diatur bisi nyediaka trofi enggau wang lalu bisi dipasuk 142 pemain nyengkaum menija tim,” ku iya.