Udah tu iya deka fokus ba pekit Mr World di Thailand
KUCHING: Jaguh Neranting Tubuh (Body Builder) menua, Buda Ancah mujur bulih midul engkeraju ba kategori berat 70 kg ba pekit Mr Asia 2015 ke diatur di Tashkent, Uzbekistan berengkah 29 September nyentuk 4 Oktober 2015 tu tadi.
Taja pan enda mujur ngetanka midul emas ke dijapai rambau pekit ke sama ba taun seiti nyin kemari di China, peranak Sri Aman tu tetap temegah enggau pemujur ke dijapai iya.
Bejaku ngagai Utusan Borneo, Buda madah udah nyangka pemar ti ditapi ba pekit nya kelebih agi napat pemekit ari Thailand, India, Vietnam enggau Iran.
“Taja semina bulih midul engkeraju, pekara nya enda ngasuh aku tusah ati laban mengkang agi ulih niki podium ba penuduk lumur tiga,”ku iya.
Kenu ku Buda, iya udah naka ulih ngaga pekara ke pemadu manah rambau pekit nya ke alai gaya tubuh iya benung ba pendiau ke manah lalu iya nerima pemutus raban akim ti profesional.
Udah tu ila, Buda deka fokus enggau seiti agi pekit iya nya Mr World di Bangkok, Thailand ti deka diatur berengkah 23 nyentuk 29 November 2015.
Kena napi pekit nya, Buda deka ngemeranka atur milih pemakai (diet) dikena nentuka pendiau tubuh iya majak manah.
Ba pekit Mr World di Mumbai taun ke udah, Buda bulih penuduk lumur dua ba kategori tebuka master 80 kg enggau penuduk lumur lima ba kategori berat 70 kg.