KUCHING: Parti Keadilan Rakyat (PKR) Sarawak nyemetak nyadi sebagi ari Pakatan Harapan Sarawak, ku Chairman iya Baru Bian.
Iya madah, pekara nya berindik ari penerang ketuai komiti besai ketetiga parti (PKR, DAP enggau AMANAH) ba renggat nasional bedau lama tu tadi ti madahka gempung baru parti penyakal, iya nya Pakatan Harapan diarika parti nya.
“Aku mantaika pekara tu berindik ari berita tu ke bisi pansut ba surat kabar Hari Lima tu tadi, bekait enggau aum media begulai enggau DAP sereta AMANAH, laban maya nya pengari kami (PKR) nadai datai aku deka nerangka pasal pekara nya sebaka enggau penerang aku sebedau tu, iya nya kena 25 September tu tadi.
“Tuai pemesai kami ba renggat nasiobal udah madahka PKR, DAP enggau AMANAH udah ngaga gempung baru ke dikelala enggau nama Pakatan Harapan… Nya alai aku madahka ditu, PKR Sarawak sebagi ari Pakatan Harapan, sebaka enggau tusun gempung di renggat nasional.
Reti nya, PKR Sarawak diatu sebagi ari Pakatan Harapan Sarawak,” ku iya.
Baru ti mega nyadi Kaban Kunsil Nengeri (ADUN) Ba’ Kalalan madah, seiku ari sida iya udah dipadah, iya nya ketuai parti bisi kala dibai sama enggau gempung Pakatan Harapan tang sida iya bedau mutuska pekara nya.
Nya alai ku ku iya, ba renggat nengeri, PAS Sarawak deka nitihka utai ku tuai pemesai sida iya di renggat nasional, enggau Pakatan Harapan.
“Aku deka madah ditu baru, iya nya PKR Sarawak sanggup lalu besedia bekerejasama enggau raban kami dalam gempung baru tu, nyengkaum DAP.
Anang enda ingat iya nya kami seruran konsisten ngetanka penemu kami.
“Seagi Pakatan Rakyat bisi, kami agi ngaul PAS, sementara DAP ningkilka diri ari Pakatan Rakyat.
Nya alai, kerejasama dalam Pakatan Rakyat Sarawak nyangka bisi besibil mimit,” ku iya.
Nangkan nya, ku Baru nengah penumbuh gempung baru nya, semua parti (penyakal) patut majakka pengawa nuju peneka ke sebaka lalu beratika PAS ukai raban Pakatan Harapan, nya alai pekara nya enda ibuh dipejuraika tauka dijangka sengapa.
“PKR Sarawak udah netapka penemu kami bekait enggau pekara hudud lalu kami pan enda patut bejuraika pekara nya agi,” ku iya lalu nandu diatu gempung parti benung mutarka danji lalu ngemutarka pemereti ati dalam Pakatan Harapan.
Udah nya, Baru madah pengudah semua pekara nya mujur digaga ila, PKR deka berengkah berunding enggau DAP enggau AMANAH di Sarawak bekait enggau pengawa magi kerusi Kunsil Nengeri (DUN) ke nyadi pekara dikena napi pengawa bepilih besai menua (PRN) ti deka datai.
“Aku ngarapka kaul ke dinamik ulih meri penguntung begulai enggau kaban gempung dalam Pakatan Harapan ke pemerat rayat Sarawak, nyengkaum Malaysia,” ku iya.