Dikarang Chris Bishop //
KUCHING: Bisi tiga iku nama kaban Parti Sa’ati Rayat Sarawak (SUPP) bisi dirintaika deka dipilih nyadi chalun ngarika parti nya ngerampas penuduk N.10 Pending ari penyakal maya Pengawa Bepilih Kunsil Nengeri (PRN) ke deka datai.
Sida tu nyengkaum Presiden iya, Senator Datuk Profesor Dr Sim Kui Huan, Ketuai Nembiak parti Tan Kai enggau Sekretari SUPP Pampang Pending Milton Foo.
Taja pia, entara sida tiga tu semina seiku aja deka dipilih lalu besatup enggau pemangku penuduk (N.10 Pending) Violet Yong ari DAP.
Lebuh dikerandau pemberita kemari, Milton,38, ke mega nyadi Sekretari Pemadah enggau Publisiti Nembiak SUPP madahka nama ketetiga sida sigi udah dibantaika parti kenyau dua bulan ke udah.
Iya madahka diri nyanggup pinta parti ke deka ngangkatka iya nyadi seiku chalun, Milton madah pekara nya meri awak ngagai iya betemu sereta meri servis ngagai rayat.
“Dalam timpuh 2 bulan tu, aku udah betemu sereta ngelala sekeda penanggul tauka isu ke ditapi rayat.
“Awak tu meri peneleba ke chukup manah ngagai aku lalu aku enda meri semaya sengapa ngagai rayat.
“Perengka guna ke diguna ninting hari baka ke pemeresi parit kandang endur diau entara pekara ti patut diperatika perintah enggau berat,”ku iya.
Dulu agi ari tu iya udah bejadi Annual Charity Fair ke diatur Kuching Life Care Society di Dewan Masyarakat Padungan ditu.
Pekara ke berat ku Milton iya nya ngenatai pinta enggau peneka rayat ketegal sida meh ke nyadi orang mayar chukai.
Ngenang pekara bukai Milton madah udah ngaga ripot polis sentang tuduh Sapit Menteri Betanam Betupi enggau Asas Tani Datuk Seri Tajuddin Abdul Rahman.
Ku Milton, Tajuddin bisi nuduh peranak China Malaysia ti ngenataika sebana ngagai orang luar lalu minta dijaga perintah menua luar patut ngasaika tampar ari iya.
“Aku ngaga ripot polis ngambika otoriti tau mansik pekara tu enggau silik.
“Iya (Tajuddin) enda ngaku diri bisi mansutka jaku nya, udah nya iya madahka bejaku munyi nya semina jaku dikena betundi aja.
“Kitai enda nemu ni bagi pekara ke amat lalu minta polis bejalaika pansik,”ku iya.
Iya nambah jaku Tajuddin nya ngeruga pengelikun peranak China Malaysia, nyengkaum aku lalu jaku tu dipansut seiku menteri ba renggat perintah besai.
Tuduh tu tau dipansik nengah Criminal Intimidation Seksyen 503 Penal Code, tandu Milton.
Sida ke nyadi menteri, ku Milton enda patut sengapa mansutka jaku kelebih agi ba pekara ke sensitif.
“Kitai nadai begunaka menteri ke landik nampar, tang kitai begunaka menteri ke landik ngereja gawa,”ku iya.