Atur pengawa meresa sida tu ngambika semua bantu ke patut ulih dipejalai enggau engkeman
Dikarang Chris Bishop //
KUCHING: Atur Pengawa Meresa Indai Tunggal renggat menua ke nerangka definisyen baru indai tunggal deka berengkah kena 22 Oktober 2015.
Berengkah ari maya nya ila,Menteri Pemansang Orang Indu, Ruang Bilik enggau Komuniti Dato Sri Rohani Abdul Karim madah pelin tauka definisyen baru nya deka diguna di serata nengeri.
Entara tuju pelin ku Rohani, dikena nentuka semua program bantu ungkup indai tunggal ti mungkur ekonomi sereta pengawa rama ulih dipejalaika enggau engkeman agi.
“Pelin tu dituku lalu udah disetuju semua ngambi bisi dikena nyerenih statistik indai tunggal, enti enda pia kitai deka bisi statistik ti bebida.
“Dulu agi ari tu kitai bisi bemacham statistik, opis perangkaan lain statistik, JAKIM lain statistik , opis menteri orang indu lain, opis pelajar enggau opis pengerai pan lain.
“Ketegal nya aku ngasai pekara tu enggai nyadi dilak pia aja, kitai patut setujuka seiti definisyen ke alai definisyen tu udah dikemendar kabinet,”ku iya.
Rohani mansutka jaku tu ba seiti aum pengarang berita pengudah bejadi Program Let’s Get Together 2015 di sebengkah hotel ditu, kemari.
Berindik enggau nya iya netap semua ijinsi perintah di serata menua kelimpah ari JAKIM deka nguna definisyen baru nya.
Semina JAKIM enda setuju lalu nya ba sentang status anak enda sah, tang kitai setuju ketegal nya mega anak …tang kitai enda mega meransang penyalah tu dikereja, tandu Rohani.
“Nengah definisyen baru nya, indai tunggal deka nerima bantu enggau program ke bisi disedia ijinsi perintah ke bekaul.
‘Bengkah bantu bukai baka ke elawin RM100 sebulan ungkup seiku anak deka mega diberi lalu semina ba ikas maksima RM450 aja,’ku iya.
Nitihka statistik baru (Pengudah definisyen baru diguna) Rohani ke mega MP Batang Lupar madah penyampau indai tunggal diatu iya nya 235, 240 iku enti dibandingka enggau lebih 800 000 suba.
Ku iya, diatu kitai meda penyampau nya udah diserenih ngagai lebih 200 000 lalu kitai deka magi penyampau tu nitihka program bantu ke patut diberi.
Tajapia kitai enda netapka tikas umur maksima ungkup orang indu ke patut nerima bantu indai tunggal ketegal sekeda ba umur 60 taun pan mengkang ngambi tauka ngiru anak.
Nengah definisyen baru nya, sebarang orang indu ke bisi ngadaka anak (nadai laki ) tauka ngiru anak deka dikumbai indai tunggal.
Tang enti anak nya udah enda diau enggau iya agi, udah nirika ruang bilik diri, status indai tunggal deka dikinsil.