Perintah deka meda rayat seruran maju sereta bisi ubah ba pendiau pengidup sepanjai maya: Alexander
KANOWIT: Semua projek pemansang ke diberi perintah Barisan Nasional (BN) ukai betuju dikena nginti undi.
Kaban Kunsil Nengeri (ADUN) Ngemah Alexander Vincent madah, tu endang udah nyadi tanggungpengawa BN ke deka ngubah tikas pengidup rayat.
“Tu mandangka kami perintah BN ngemeratka rayat nitihka integriti pengawa diri.
“Kami (perintah) deka meda rayat maju sereta bisi ubah ba pendiau pengidup sida sepanjai maya.
“Nadai jaku deka nginti undi tauka ngiga sukung tang kebendar iya udah nyadi tanggungpengawa perintah BN ke ngatur menua tu,” ku iya.
Iya madah munyi nya rambau Pengerami Ketuai Begulai Enggau Rayat diatur Komiti Pemansang enggau Pengelikun Genturung Pendiau (JKKK) Rumah Tedong Mani, Ulu Sungai Tuah ditu, ensana.
Sama bisi datai bini Alexander iya nya Susan Clement, Pengulu Barnabas Angkis, Pengulu Ijam Tuah, Tuai Rumah Tedong, bala kaunsilor enggau bala tuai rumah ba menua Sungai Tuah.
Iya madah, perintah BN endang naka ulih mantu rayat ari sukut ngungkupka pemansang ngagai rayat.
Kenu ku iya, bukti iya Kepala Menteri Datuk Patinggi Tan Sri Adenan Satem udah mutarka sereta ngubah kira 37 pekara sekumbang kurang dua taun udah mangku pengawa nyadi Kepala Menteri.
“Tu ukai dikena nginti undi tauka matak ati rayat tang ngemeratka peminta rayat di nengeri tu. Tu endang tanggungpengawa perintah BN.
“Pemujur Kepala Menteri udah dipuji ukai semina rayat ari nengeri tu aja tang mega rayat di Semenanjung Malaysia ke temegah meda pengawa iya,” ku Alexander.
Nya alai, iya muji Kepala Menteri laban ke seruran ngemeratka pengelantang pendiau rayat di nengeri tu.
Ku iya, Adenan seiku Kepala Menteri ke pemadu manah enggau nyulut.
Nangkan nya, iya madah sitak DUN Ngemah deka terus ngasaika mayuh agi pemansang dudi hari.
Alexander mansutka jaku jamin deka nentuka semua pemansang pugu enggau infrastruktur ulih diasaika rayat enggau lengkas nengah projek transformasyen menua pesisir (RTP).
“Aku deka bekerejasama enggau Kaban Parlimen Kanowit Datuk Aaron Ago Dagang ngemujurka pekara nya,” ku iya.
Ba pengujung jaku iya, Alexander madah deka ngungkupka geran RM15,000 ngagai JKKK Rumah Tedong dikena mantu sida bejalaika program ke bekaul.