MINTA CHELAP LINDAP: Alexander manchak jani maya pengerami nasih tanah taba Taman Medan Jaya, Rumah Joshua Medan, Sungai Tuah ditu, ensana.
KANOWIT: Kaban Kunsil Nengeri (ADUN) Ngemah Alexander Vincent ngansak bala tuai rumah ngiga nembiak redak ke dipegai sida ke empai bisi tingki enggau surat pengada.
Ku iya, diatu perintah menua udah meri awak ti muntang ngagai peranak menua tu empu iya ke empai bisi dua bengkah dokumen nya ngambika ngaga iya enggau lengkas.
“Tu seiti ari tanggungpengawa kita ke nyadi tuai rumah. Anang ngandalka Opis Pengerijista Bansa (JPN) datai niki rumah tang kita belabuh ari diatu anang laun ngiga peranak rumah panjai ke empai bisi tingki enggau surat pengada.
“Pia mega, rayat ke bukai mega anang diau diri aja tang tau madah ngagai tuai rumah ngambika sida mai pekara tu ngagai orang ti bekaul lebih agi baka JPN,” ku iya.
Iya mantaika jaku tu maya bejadi pengerami nasih tanah taba Taman Medan Jaya, Rumah Joshua Medan, Sungai Tuah ditu, ensana.
Ngenang sentang politik Alexander pechaya sukung rayat ngagai perintah Barisan Nasional (BN) ba DUN nya diatu manggai 70 peratus.
Ku iya, diatu rayat udah nyemetak nemu baka ni pengeransing perintah mai pemansang ngagai menua pesisir nyengkaum sida ba DUN Ngemah.
“Rayat udah meda nama bagi pemansang ke udah dibai perintah BN.
“Diatu rayat jarang bejai perintah bepun ari pengeransing perintah ngangkatka pengidup rayat,”ku iya.
Bela bisi datai maya tu iya nya bini Alexander, Susan Clement, Penghulu Barnabas Angkis, Pengulu Ijam Tuah, Kaunsilor Bunut Kubu, enggau Tuai Rumah Joshua.
Alexander madah, pengeransing perintah tu patut ditimbal rayat ngambika pelin pemansang enda tejanggal.
Ku iya, timbal tu patut dibantai nengah sukung rayat maya Pengawa Bepilih Nengeri (PRN) ti deka datai.
“Kitai ngarapka sukung rayat majak nambah sereta enda limpang ke bukai kelimpah ari BN,” ku iya madah baru.
Berebak enggau tu Alexander besemaya deka nyaup nembuka rumah panjai baru 15 pintu TR Joshua.
Sepenembu pengawa ba Rumah Joshua, iya udah nya ngulu Pengerami Pemesai Begulai Enggau Rayat ba Rumah Tedong Mani, Ulu Sungai Tuah ditu.
Ba pengerami nya, iya bisi madah nengeri tu ke udah dipegai Kepala Menteri Datuk Patinggi Tan Sri Adenan Satem udah mayuh insur ti nejuka orang ti ngenggaika perintah ngelama tu berasai nangi.
Iya madah, batang kebuah pekara tu nyadi bepun ari Adenan ti balat ngemeratka pengelikun pengidup rayat enda ngira bansa.
Ba pengerami tu, Alexander bisi meri RM15,000 ngagai rumah panjai nya.