Dikarang Judan Bungap //
SIBU: Sarakup Indu Dayak Sarawak (SIDS) Sibu deka ngatur Woksyop Nenun Pua Kumbu 2015 ba Tingkat 4, Dewan Yayasan Tun Jugah di Kuching kena 24 Oktober ti deka datai.
Woksyop tu diatur begulai enggau Yayasan Tun Jugah di Kuching ti nyadi tuai pengatur serak tu.
Nitihka chairperson pengatur Dato Ir. Alice Jawan, woksyop tu ila deka dipenyadi Chairperson SIDS Dato Sri Empiang Jabu pukul 9 pagi.
Alice ti mega Sekretari Besai Gerempung Dayak Sarawak (SDNU) enggau Chairperson SIDS Sibu madah, berebak enggau pengerami tu pemutus Pekit Nenun Pua Kumbu Tebuka Sarawak 2015 deka dibantai.
“Empiang mega maya tu dipebasa nyuaka perais ngagai sida ke menang ba pekit ke udah diatur kitai belabuh ari pun taun tu tadi,” pia ku iya maya madah ngagai pengarang berita ditu, empai lama tu tadi.
Berindik ari pekara tu, iya nesau mensia mayuh ke bisi ati deka belajar nenun tau ngambi bagi ba woksyop nya.
“Bayar enggau woksyop tu iya nya RM10 ungkup raban SIDS lalu sida ke ukai raban mayar RM100.
“Jaku ke dikena maya tu iya nya Jaku Iban, Inggeris enggau Malaysia,” ku iya madahka baru.
Tuju pengawa tu diatur laban deka mai raban orang indu bela ngetanka pengelandik asal nya.
Nambahka nya, pengawa tu mega tau bendar ngelakuka agi Pua Kumbu sereta ngangkatka penyampau orang indu rindu betenun.
Alice deka bejadi pengawa nutup woksyop ba hari ke sebaka pukul 4 lemai.
Mensia mayuh ke bisi ati deka ngambi bagi ba pengawa tu tau betanya ngagai pampang SIDS ti besemak.