Gramong: Hak orang indu nadai dichiping

0

Diatu mayuh sida ke bepelajar tinggi, mangku pengawa besai ba opis perintah tauka kompeni

// Dikarang Judan Bungap //

KANOWIT: Pemansang teknologi enggau pekara pelajar udah mujur ngangkatka pendiau orang indu kemaya hari tu.

Menteri Muda Pemansang Tanah ti mega Menteri Muda Dagang Temuai Datuk Gramong Juna madah, pekara tu ngujungka tanggungpengawa raban orang indu enggau lelaki diatu sebela enggau pangan diri.

“Enti suba sida ke indu suah dipeda kitai nyadi orang ke semina gawa ba dapur tauka ngibun anak ba rumah aja.

“Tang diatu sida ke indu mayuh dipeda ngembuan pelajar tinggi, mangku tanggungpengawa ke besai sekalika ba opis perintah tauka kompeni.

“Ba politik diatu orang indu mayuh udah nyadi menteri, senator enggau pengari rayat,” pia ku iya madah.

Iya mantaika jaku tu maya bejadi Pengerami Makai Lemai beserimbai enggau Pengerami Ngintu Hari Orang Indu renggat pelilih Kanowit ditu, lemai kilah ensana.

Bela bisi datai bini Gramong, Datuk Catherine Gramong, Kaban Kunsil Nengeri (ADUN) Ngemah Alexande Vincent, Sekretari Politik Kepala Menteri Maurice Giri, Pemesai Pelilih Menua Kanowit Katis Noel, Pemesai Opis Pemadah Kanowit Donny Minggu Ling enggau bini Alexander, Susan Clement.

Gramong ti mega ADUN Machan madah, orang indu ba menua tua patut berasai temegah laban perintah ba menua tu enda bechiping enggau sida.

Ku iya, ukai semua menua ngangkatka pendiau orang indu sebela enggau lelaki.

“Nya alai, kitai ditu meda orang indu bela diberi ‘hak’ baka sida ke lelaki,” ku iya madah baru.

Taja pia, ku Gramong, agi bisi penusah nyadi nuntung sida ke indu baka dijamah tauka penanggul ba ruang bilik.

Penusah baka tu ku iya patut dipunaska laban tanggungpengawa orang laki ngintu sereta ngibun pengelikun orang indu.

“Ngarapka mensia mayuh kemaya hari tu sama ngemeratka pengelikun orang indu.

“Anang ngemaruhka orang indu tang ibun mih sida enggau manah,” pia ku seraya madah pengerami ke diatur lemai nya engkeman diatur dikena ngelai basa ngagai orang indu.

Pengerami ke digulu urung 600 iku mensia mayuh nya bela bisi ngatur Pekit ‘Ratu Kebaya’ kelimpah disempulang program pemerindang ke bukai baka karaoke.

Gramong mega maya tu dipebasa nyuaka Anugerah Sukan Terbaik Peringkat Daerah Kanowit.