SERIAN: Menteri Pengatur Pemayuh Pengereja Pengawa, Datuk Seri Richard Riot Jaem minta peranak Sarawak meri mandat ke besai ngagai Barisan Nasional (BN) maya Pengawa Bepilih Nengeri (PRN) ti deka datai tu.
Ku iya, peranak Sarawak patut nerima pemanah pelin ke udah diatur Menteri Besai ke mega Chairman BN, Datuk Seri Najib Tun Razak, iya ke suah udah bejalai ngabas nengeri Sarawak lalu udah besemaya ngagai nengeri tu bepelasarka penyampau pemutus undi diberi ba chalun BN.
Kaban Parlimen (MP) Serian nya andal amat dalam PRN tu ila, iya mega madah, pemutus ke manah dalam pengawa bepilih nya dipenggi BN Nengeri deka meransang perintah besai lebih agi kena napi mayuh macham ulah ke nyadi di Semenanjung.
“Aku pechaya semua kita deka sepenemu enggau Menteri Besai, Datuk Seri Najib nya semak enggau ati rayat Sarawak nyengkaum ba Serian ditu. Kenyau ari mangku pengawa nyadi Menteri Besai kena 9 April 2009, iya udah suah bejalai nemuai ke Sarawak, sereta iya udah tiga kali datai ke Serian nyengkaum pejalai iya keterubah ngagai Kampung Pichin, dalam timpuh dua bulan pengudah iya mangku pengawa.
“Projek ari perintah ukai pekara ke datai nengah jalai muntang. Bisi maya aku suah betanya ngagai diri empu nama pekara ke patut dikereja sekalika ba kami peranak Sarawak tauka ba Serian ditu kena malas pemanah jasa iya. Jalai ke pemadu manah iya nya nengah undi ngagai Chalun BN dalam PRN tu ila, iya ke dipelaba deka diatur dalam timpuh lima bulan ke deka datai tauka dalam bulan Mach taun baru lalu hari iya semina Kepala Menteri kitai aja nemu.”
“Beduduk ari pengawa tu ungkup bepilih nengeri, pemutus iya ila meri pangka ngagai perintah besai iya ke diketuaika BN,” ku iya.
Riot mantaika pekara tu lebuh nyuaka geran penyampau semua RM680,000 ngagai 63 iku penerima bepalan ba Balai Mensia Mayuh Serian ditu ensana.
Raban penerima tu iya nya renggat ketiga nerima geran ari Riot ungkup taun tu. Kesemua penyampau geran tu datai ari Agih Pemansang Mit Menua Pesisir (MRP) diungkupka ngagai sitak Parlimen Serian penyampau RM640,000 lalu penyampau RM40,000 da agi ari agih belanja Opis Menteri dikuasa Riot empu.
Dalam pekara ke bukai, Riot mantaika enda lantang ati iya bekaul enggau berita tumpuk pendiau ba Jalai Mentung Merau ke nyadi batang berita apin lama ke udah ketegal kebuah ke salah pengudah pekara bekal ai dipolitikka sekeda raban orang.
Laban iya enda nyata, nama tumpuk pendiau nya, iya nyangka madahka Kampung Sungai Empani iya ke diuan 90 buah ruang bilik napi penusah bekal ai.
“Semina ketegal pekara enda beserakup peranak menua nya, penangul ai nya nyadi pekara ke berat dataika serata menua nemu pasal nya. Aku bejaku munyi tu laban ‘mainan politik’ ke bisi nyadi ba tumpuk pendiau nya. Taja pekara tu enda ngerembai ke bukai, tang iya ulih mai pangka ngagai nama menua Serian,” ku iya.
Sekeda raban ke bisi ngulu pengawa nya kemari iya nya Residen Serian Dahim Nadot, Sekretari Politik Opis Menteri Pengatur Pemayuh Pengereja Pengawa Major (Rtd) Peter Runin sereta Temenggong Bidayuh Henry Bujang Sadok.
Riot mega meri basa ngagai Dahim, ke udah ngembuan peneleba dalam bejalaika servis sivil ngujungka iya dichiri nyadi Residen keterubah Bagi Pelilih Menua Serian berengkah ari 1 Oktober tu tadi.