Berindik ari pinta ke majak niki Pelilih Mit Song ngarapka loji pemeresi ai nya dikemesai
// Dikarang Chris Bishop //
KUCHING: Peranak Pelilih Mit Song ngarap perintah ulih nambahka kapasiti loji pemeresi ai Song ngambika chukup dikena nangkup pinta bekal ai ninting hari.
Penyuah suntuk bekal ai di pelilih nya lebih agi maya orang begunaka ai entara kebuah pengulih loji nyendiaka bekal ai beresi nya dikutuk mensia mayuh.
Meretika penusah tu, sekeda raban ketuai raban bansa ngenataika pekara tu ngagai Protem Chairman DAP Katibas, Paren Nyawi lalu sida ngarap perintah ulih ngagihka belanja ari bajet 2016 dikena ngaga loji meresi ai nya besai agi.
“Penusah suntuk bekal ai tu suah nyadi urung pukul 5.00 nyentuk 9.00 malam lalu nanggul pengidup urung 3,000 iku mensia ke nguan genturung pendiau di Gelam, Baru, Cina, Mission, Rian enggau genturung bukai ke ngelingi.
“Sekeda ke bisi betapi enggau penusah ke sama iya nya peranak rumah panjai di Nanga Kebiaw, Nanga Muyun, Naga Sepadi, Sungai Sebelalang enggau Nanga Nyimoh,” ku Paren.
Nambahka nya, Paren mega madah sekula enda diseliah ari dituntung penusah ke sama kenyau bulan Jun tu tadi.
Ku iya, maya kemarau tikas ai di Sungai Katibas deka nurun lalu mai penanggul ngagai SMK Song, SK Cardinal Vaughan enggau SJK Hin Hua.
“Loji pemeresi ai Song tu udah bejalaika operasyen dalam timpuh 20 taun nyendiaka bekal ai ngagai 20,000 iku orang lalu diatu meh maya palan tu diangkatmanah.
“Diatu peranak ke nguan sitak mit menua tu udah majak nambah lalu loji nya mega enda tetangkupka pemayuh mensia, nya alai, kitai ngarapka perintah ngangkatmanah loji tu.
“Penembu pengawa ngaga jalai Sibu-Song-Kapit ila deka matak mayuh agi orang datai ditu,’ku iya.
Kelimpah betapi enggau suntuk bekal ai, peranak di Song mega irauka kualiti ai ari loji nya.
Ku Paren, bepun ari bulan ke udah (September) mayuh peranak menua nya diripot ngidap pedis perut sereta bira chirit.
“Sekeda madah kualiti ai enda manah ketegal sebun asap ti malut menua dalam timpuh nya, kitai ngarap perintah ulih bejalaika pansik sentang pekara tu.
“Opis Bekal Ai Menua Pesisir (JBALB) patut mansik tikas kualiti ai ngambi tau nentu kualiti ngipakka ‘National Drinking Water Quality Standard’ lalu mantaika asil pansik ngagai mensia mayuh ,” ku iya ke mega asal Nanga Sepadi.