// Dikarang Chris Bishop //
KUCHING: Dayak National Congress (DNC) minta Perintah Nengeri bebasaka pemutus kort ke udah ditetap ba kes Nor anak Nyawai ba pechara kes tanah bansa asal (NCR) dulu suba.
Presiden Mengga Mikui madah basa nya berat laban ba seiti kes ke sama, iya nya entara Tr Sandah anak Sabau ari Machan Kanowit enggau Perintah Nengeri benung nganti pemutus Kort Apil.
“Bulan dulu tu tadi kitai mendingka pechara kes Tr Sandah iya sebengkah apil ke digaga Perintah Nengeri ngambi tau ngalahka pemutus ke udah diletak kort dulu agi ari tu.
“DNC ngembuan runding ke alai Perintah Nengeri patut bebesaka pemutus ke udah digaga rambau kes Nor anak Nyawai suba.
“Pemutus nya patut enda diubah, kelebih agi pemakai menua (NCR) chukup beguna ungkup kitai bansa Dayak,” ku iya.
Iya mansutka jaku tu ba seiti aum pengarang berita pengudah ngulu Aum Besai Ninting Taun (AGM) DNC ditu, kemari.
Kes Tr Sandah ti bekaul enggau tanah NCR masuk apil ti ke-3 ke digaga perintah, ke alai ba dua apil ke dulu agi, perintah udah alah.
Ngenang kaul ke sama, Mengga madahka pemansang ekonomi bansa Dayak tebal agi bepanggai ba tanah NCR.
Ku iya, DNC minta Perintah Nengeri ngakun hak ba tanah NCR bansa Dayak lalu mega nyendia jalai ungkup bansa Dayak ngemansang tanah sida.
“Bank patut ngakun tanah NCR lalu enti bisi bekaul enggau pengawa numbuhka kebun sawit, MPOB patut mega ngakun tanah NCR.
“Tanah NCR patut dinah nyemaka tanah ‘mix zone’. Enti enda pia, tikas pengidup rayat ke nguan menua pesisir deka tinggal belama,” ku iya nambah.
Rambau AGM kemari, empat resolusyen udah disetuju, iya nya (keterubah) minta Perintah Besai enggau Nengeri ransing agi bejalaika pengawa ti tau ngangkatka tikas pelajar bansa Dayak.
Pekara nya mungkur pengawa ngemanah sekula di menua pesisir, ngaga sekula baru, ngambi mayuh agi pengajar ke asal ari Sarawak lalu ngangkatka English nyadi jaku ke diguna.
Resolusyen kedua minta Perintah Besai nyendia seiti wang turu ngambika tau dikena ngemansang ekonomi bansa Dayak. Ketiga, minta Perintah Nengeri nentuka mayuh agi bansa Dayak diberi awak gawa ba opis perintah.
Keempat, DNC minta Perintah Besai, Perintah Sarawak enggau Sabah nyendia chara ti engkeman dikena nyekat pengerembai raban orang ektrimis ari Semenanjung Malaysia ari ke tama ngagai Sarawak enggau Sabah.
Bela datai ba aum pengarang berita Sapit Presiden Datuk John Tenewi Nuek, Mandal Presiden Paul Raja enggau Sekretari Besai Richard Lias.