Ruang bilik ke tegap deka nempa komuniti ti mujur sereta progresif

0
KELAI BEJADI: Jamilah nyain plaq ‘Saya Sayang Keluarga Saya’ pengudah ngelanchar BKK1M kemari.

KELAI BEJADI: Jamilah nyain plaq ‘Saya Sayang Keluarga Saya’ pengudah ngelanchar BKK1M kemari.

KUCHING: Pansik Rayat enggau Ruang Bilik Malaysia Kelima (KPKM-5) ke dipejalaika Lembaga Penduduk dan Pembangunan Keluarga Negara (LPPKN) ba taun ke udah mandangka 52.2 peratus peranak Sarawak ngarika sebuah pugu ruang bilik ti ngembuan laki, bini enggau anak.

Bini Kepala Menteri, Datin Patinggi Dato Jamilah Anu madah bepelasarka asil pansik nya, tampak mandangka pugu ruang bilik mengkang bekuasa ‘dominan’ di nengeri tu.

“Taja pia, sepekara ke patut dikeingat iya nya sentang pengidup aki enggau ini kitai ke alai sida mega nyadi orang ke beguna ba tetiap ruang bilik.

“Asil KPKM-5 mega mandangka 40 peratus orang tuai di nengeri tu kala ngasai diri sunyi. Isu tu patut diputar enggau lengkas ngambi sida ulih nempuh pengidup ti bekualiti,’ku iya.

Iya mansutka jaku tu rambau ngelancharka ‘Bulan Keluarga Kebangsaan 1Malaysia (BKK1M)’ ba sebuah palan bebeli barang ditu, kemari.

Jamilah nambah, institusyen ruang bilik megai tanggung pengawa besai dalam nentuka pemansang tetiap menua.

Ku iya, ruang bilik ke tegap deka nempa komuniti ti progresif sereta ngembuan pengering besemekih.

“Sayau mih ke ruang bilik diri. Enti nadai sida sapa kitai sehari tu,” ku iya.

Ngenang kaul bukai, iya netapka Sarawak chunto ti pemadu manah ba sentang penyerakup enggau penegap kaul entara raban pupu bansa di menua tu.

Kitai di Sarawak ku iya, ngarika sebuah ruang bilik ti besai ke enda kala begedika bansa bukai.

“Kitai 1Malaysia lalu enti kitai berandauka sentang 1Malaysia, pekara nya nyadi di Sarawak ditu.

“Kitai nyadi chunto ke pemadu manah ke alai urung 30 pupu bansa ti nguan nengeri tu idup beserakup begulai enggau pangan diri,” ku iya.

Nyerumba BKK1M, program ‘Jelajah Keluarga Bahagia (JKB)’ udah dilanchar di Pusa kena 15 Mac 2015 tu tadi.

Program nangkanka nya lalu diatur di lapan iti palan di serata menua nyengkaum Bekenu, (Sarawak), Sabah, Perak, Terengganu, Melaka enggau Kedah.

Bela datai bisi datai maya nya Menteri Pemansang Orang Indu, Ruang Bilik enggau Komuniti Dato Sri Rohani Karim, Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah enggau Menteri Muda Pengintu Pengelantang Robert Lawson Chuat.