JKKK dilalau anang lembau ngemansangka genturung pendiau tauka rumah panjai sida

0

SRI AMAN: Kaban Kunsil Nengeri (ADUN) Simanggang, Datuk Francis Harden Hollis meransang Komiti Pemansang enggau Pengelikun Genturung Pendiau (JKKK) di nengeri tu bejalaika tanggung pengawa be renggat genturung pendiau tauka rumah panjai ngenataika penanggul ti ditapi nembiak redak sida.

Ku iya, tanggungpengawa sesebuah JKKK ukai semina ngiring nembiak redak aja tang komiti dalam JKKK nya patut regas agi ngemansangka genturung pendiau sida.

“Aku enggai ninga JKKK enda engkebut ngereja pengawa serata mai ubah enggau pemansang ba genturung pendiau sida.

“Enti genturung pendiau tauka rumah panjai kita majak mansang sereta berubah nitihka pemansang dunya, nya mandangka JKKK ba genturung pendiau rumah panjai nya regas bejalaika pengawa,” ku iya.

Iya ti mega Menteri Muda Pemansang Menua Pesisir enggau Pengawa Berumah Sarawak bejaku munyi nya ba pengerami Ketuai Begulai enggau Rayat ti diatur Parti Sa’ati Rakyat Sarawak (SUPP) Pampang Engkilili enggau JKKK Rumah Engkabi, San Semanju Engkilili ditu ensanus.

Bejaku baru ku Harden, kelimpah ari mikir ngemansangka genturung pendiau JKKK mega patut ngemanahka rampa sereta meresi genturung pendiau sida nengah pengawa beripai.

Nnegah awak nya, Harden madahka sukung ti diberi rayat ngagai perintah beguna amat laban nya ulih nyaup ngemujurka agenda pemansang di nengeri ti lalu pulaika penegap politik.

“Rayat patut berasai gaga ati ngasaika pemansang ti udah sereta benung dipejalaika perintah sechara berenggat,” ku iya.