BESEMBIANG: Jamal (dua kiba) betuaika raban bukai besembiang ba kubur ti kena lantak, kemari.
SIBU: Gerija Anglikan St John Sibu udah ngaga ripot polis ketegal sekeda ari laman gerija nya bisi rusak udah ke bekau alai penusah bebadi jalai alun nyadi kena lemai kilah ensana.
Chairman Komiti Gerija Anglikan Saint John Sibu Reverend Canon Jamal Senada madah, ripot polis tu digaga ngambika gerija sida ulih minta pampas.
“Iya ke rusak tu nyengkaum pagar, empat iti kubur, lima iti lampu pagar, lima iti pasu bungai kelimpah kereban ke bukai.
“Kami ngarap piak ke bekaul datai betemu berandauka pekara tu ngambika ulih digaga baru,” pia ku iya maya berandau enggau pengarang berita ditu, kemari.
Taja pan baka nya, ku Jamal, gerija sida empai nemu penyampau ungkus dikena ngadu baru kereban ke rusak nya.
Kilah ensana, seiku lelaki, 50, ke ngena mutosikal bebadi udah ke belantak enggau sebuah kerita sebedau kerita nya tepawah ngagai pagar gerija nya di Jalai Tun Abang Haji Openg ditu.
Mutosikal nya mega tepelanting tama ngagai laman gerija.
Ku Jamal, naka ke diatu nadai orang datai ngelawa sida berandauka pekara nya.
Ku iya, ketegal empat iti kubur (ba laman gerija) nya bisi pechah, raban gerija sida ngatur pengawa sembiang ba kubur nya.
Nusi maya penusah nya nyadi, iya ke endang diau ba sepiak gerija maya nya benung nyumai sebedau ninga munyi inggar.
“Maya nya urung pukul 6.20 lemai. Ninga munyi inggar aku beguai pansut keluar lalu meda seiku lelaki gegaring,” pia ku iya madah.
Kelimpah ari penusah nya, Jamal mega madahka urung dua taun sebedau tu bisi seiku nembiak bebadi ketegal dilantak enda jauh ari gerija sida.