AMPUH BAH: Rumah panjai Long Panai enggau sekula ampuh bah kena pukul 3.30 lemai. — Gambar Jau Laing
MIRI: Long Panai di Apoh Baram, genturung pendiau keterubah endar diripot dituntung penusah ampuh bah ensanus.
Tuakng pengerembai berita Parti Keadilan Rakyat (PKR) Baram, Jau Laing ti meri penerang ke pemadu baru pasal penusah nya ensanus madah, tikas penalam ba rumah panjai nya diatu udah datai sekaki.
Padang bol enggau kuaters SK Long Panai mega ampuh ketegal ai bah ari sungai Tutoh kena pukul 1.30 ngalih hari ensanus.
Jau lebuh ti ditanya baru pasal ampuh bah nya madahka tikas ai majak niki pukul 3.30 lemai serta meransang opis ke bekuasa nyendiaka bantu ngagai peranak rumah panjai nya.
Kelimpah ari nya, sekula primari di Long Terawan, ke mega di Tutoh sama ampuh bah kena pukul 3.30 lemai ba hari ke sama.
Berebak enggau nya, Long Silat di Ulu Baram mega dituntung penusah ampuh bah ngenyit pengudah hari ujan bangat enda ngengetu kena malam Hari Satu. Taja pia, ai nya surut kena pagi hari siti nya.
Kaban Kunsil Nengeri Telang Usan, Dennis Ngau lebuh ditanya pengarang berita ngenukuka berita nya madah, penusah ampuh bah ngenyit nya nyadi ketegal ai ti melumpa ari parit ba belakang panjai nya.
“Aku baru udah berandau enggau Temenggong Joseph Ngau Lian ari rumah panjai nya, lalu iya madahka endang amat bisi nyadi penusah ampuh bah ngenyit. Iya mega madahka penusah nya bepun ari ai ti melumpa ari parit di belakang rumah panjai ketegal ujan bangat ba malam ke sebedau nya,” ku iya.
Iya mega madahka tikas ai ba Silat ensanus bela tinggi ketegal ujan bangat.
Ripot mega madahka tikas ai di Long Luten, ti sama dalam sitak ke dipegai Dennis majak tinggi.
Lebuh ke ditanya sekalika iya bisi nerima sebarang ripot ari peranak menua di Long Luten ensanus, ku Dennis, naka ke diatu bedau bisi tang enti tikas ai majak tinggi dalam timpuh dua tiga hari tu ila, orang ke berumah ba tebing ai dipelabaka deka ampuh.
“Enti tikas ai majak nambah sereta datai ba ikas ti tau ngenusahka, padah ngagai raban bekuasa. Aku deka ngasuh orang ti diau semak enggau tebing ai seruran bejejaga sereta pindah ngagai endur ke tinggi agi enti datai ba maya ke patut ,” ku iya.