Masing: Ngatika diri tauka nyemilik baru parti lama

0

Dikarang Judan Bungap//

 

ARI KANOWIT: Gramong nyuaka tepa ngagai Masing seraya dikemata Alexander enggau Susan (kanan) maya pengerami bejadi Malam Main Asal Pesta Kanowit ditu, lemai kilah ensana.

ARI KANOWIT: Gramong nyuaka tepa ngagai Masing seraya dikemata Alexander enggau Susan (kanan) maya pengerami bejadi Malam Main Asal Pesta Kanowit ditu, lemai kilah ensana.

KANOWIT: Parti Rakyat Bersatu (UPP) enggau Parti Tenaga Rakyat Sarawak (TERAS) patut sebilik enggau Barisan Nasional (BN) nyema sida keras deka ngena lambang ‘Dachin’ maya Pengawa Bepilih Nengeri (PRN) ti deka datai.

Tang ku Menteri Pemansang Tanah, Tan Sri James Jemut Masing madah, dua bengkah parti tu patut ngaga pemutus pulai baru ngagai Parti Sa’ati Rayat Sarawak (SUPP) tauka Parti Demokratik Progresif Sarawak (SPDP) enti enggai ngena lambang diri empu.

“Ba aku penanggul sida diatu muntang diatur. Pulai baru ngagai parti lama tauka ngena tambai diri empu tang ukai beambi ulih beterabaika nama manah BN,” pia ku iya madah.

Iya mantaika jaku tu maya bejadi Malam Main Asal Pesta Kanowit ditu, lemai kilah ensana.

Iya ti mega Presiden Parti Rayat Sarawak (PRS) madah, enti sida enggai pulai ngagai parti sida ke sebedau tu, sida tau nunda singkang pengari BN ke dulu suba ti ngena tambai diri empu nyema deka enggau bepilih.

Berebak enggau tu Kaban Kunsil Nengeri (ADUN) Baleh nya mega muji Menteri Besai Datuk Seri Mohd Najib Tun Razak ti udah mai pemansang ngagai nengeri Sarawak enti dibida enggau orang bukai ke dulu suba.

“Nya alai, kitai meseti nyukung pegai Najib ti udah bebendar ngemansangka nengeri tu.

“Ambika banding, baka projek Jematan Kanowit, sebagi ari projek Jalai Kanowit-Song-Kapit, ti nyantilka Kanowit enggau Sungai Poi deka mai pengelantang ngagai mensia mayuh enti udah tembu ila,” ku iya madah.

Nambahka nya, ku Masing, pekara tu deka ngerembaika pemansang Kanowit majak kelimpah ari mayuh bengkah pemansang ke bukai.

“Semua tu nyadi magang bepun ari pengeransing Najib kelimpah ari penyakah Kaban Kunsil Nengeri (ADUN) Machan, Datuk Gramong Juna,” pia ku iya.

Ngenang pengerami ke diatur nya, iya ngarapka rayat dia ulih ngena awak nya nyintalka agi kaul enggau pangan diri ti bela seperabung enggau BN.

Bela bisi datai maya tu iya nya Menteri Muda Pemansang Tanah ti mega Menteri Muda Dagang Temuai Datuk Gramong Juna, ADUN Ngemah Alexander Vincent, Sekretari Politik Kepala Menteri Maurice Giri, Pemesai Opis Pelilih Kanowit Katis Noel Nyabong, bini Gramong Datuk Catherine Gramong enggau bini Alexander Susan Clement.