Dikarang Rengenyan Labang//
BAU: Kepala Menteri Datuk Patinggi Tan Sri Adenan Satem enda ngubah pemutus sereta penemu ti ngemeratka atur ngena Jaku English sebaka enggau Jaku Melayu di nengeri tu taja pan sekeda orang nyengkaum ari Malaya ngayanka diri enda lantang ati.
Adenan nandu, perintah nengeri deka nguna sereta ngemeratka Jaku English sebaka enggau Jaku Melayu, lalu ukai reti ngelaung tauka ngelengkaka Jaku Melayu.
Iya madah, pemutus iya ti ngemeratka Jaku English sama enggau Jaku Melayu mega enda nyadi penanggul ba konstitusyen.
“Enda, laban aku ukai madah, Jaku English deka nganti Jaku Melayu, ukai. Jaku Melayu terus dikemerat sama enggau Jaku English, kededua jaku nya ulih dikemansangka tauka dikemeran sereta dikemeratka di nengeri tu.
“Nuan enda ulih nyangkal tauka ngenggaika English nya jaku antarabansa, enda ulih ngenggaika nya, reti ku aku iya nya realistik, enti nuan enda sama ngemeratka jaku tu (English) nuan deka tinggal di belakang.
“Taja pia, aku bebasaka penemu ti dipansutka sida iya nya,” ku iya lebuh dirandau pemberita kemari.
Adenan mansutka pekara nya lebuh dipinta nimbal jaku ke dipansutka penyanding penemu Pengawa Rama enggau Main Asal opis perintah, Tan Sri Rais Yatim ti madahka pemutus Kepala Menteri (Adenan) nya ulih ngeruga penyerakup rayat nengeri tu, lalu Rais madahka diri enda nyukung penemu perintah Sarawak.
Dulu ari nya, Adenan ngulu lalu bejadika Majlis Penyampaian Warta Rizab Komunal Bumiputera Seksyen 6, Surat Hak Milik Tanah Seksyen 18, enggau Cek Pampas Tanah ti diatur Opis Tanah enggau Survei Pelilih Kuching ba Dewan Suarah Bau ditu, kemari.
Ngenetapka Jaku English nyadi jaku kedua dikemeratka di nengeri tu kelimpah ari Jaku Melayu, nya sebengkah pemutus berani ari Kepala Menteri dalam timpuh kurang ari dua taun.
Nitih penerang ari iya, lebuh bejaku ba pengerami nya kemari, urung 48 bengkah pemutus udah dipejalaika iya ke ngemeratka sereta meri penguntung ngagai rayat mayuh lebih agi ke diau di menua pesisir, baka ngemeratka pemansang menua pesisir, leka jaku Allah nadai penanggul dikena di nengeri tu; bayar tol di nengeri tu deka diketuka magang sereta mayuh pemutus bukai.
Berindik ari pekara nya Adenan ngarapka rayat nengeri tu ulih meri peluang ke panjai ngagai iya ngiring nengeri tu laban agi mayuh pemansang tauka pemutus ti deka dipejalaika iya, lebih agi ungkup menua pesisir.
“Perintah Barisan Nasional mengkang tegap ketegal sukung ari rayat menua pesisir, nya alai sida di menua pesisir patut ulih ngasaika penyamai ari sukung ke diberi sida.
“Nya alai aku minta semua rayat meri peluang lima taun da agi ngagai aku, tu ukai ketegal aku gila pangkat tang awakka ulih meri peluang ngagai aku ngaga mayuh agi pemutus enggau pemansang di nengeri tu,” ku iya.