KE PENGINGAT: Dennis (tengah) disempulang Arlyina (tiga kanan), Amo (tiga kiba), Aaron (dua kiba) begambar Dennis pengudah merarau ba sebuah hotel ditu kena Hari Satu tu tadi.
MIRI: Pemujur dua iku nembiak bansa Penan ari SK Long Kevok di Baram ti udah bulih pemutus 5A ba UPSR taun tu, mandangka sekula nya majak maju sereta nengah singka ke betul sereta udah mujur nempa tiga iku nembiak Bansa Penan ti beulihka 5A naka ke diatu.
Keterubah nembiak Penan bulih 5A iya nya Bonia Galang ba UPSR taun 2013.
Bonia ti ngembuan juluk ati deka nyadi lutur jemah ila, diatu benung nampung pelajar iya ba sekula SM Sains Miri.
Taun tu, dua iku agi nembiak Penan bulih 5A iya nya Amo Jengen enggau Arlyina Maya Agust. Dua iku agi nembiak ti bulih pemutus ke manah iya nya Aaron Eric (4A, 1B) enggau Ridzuan Ahmad (3A, 2B).
Kaban Kunsil Negeri Telang Usan, Dennis Ngau ti melanja nembiak merarau ba sebuah hotel ditu lebuh lebuh sida bisi nemuai ngagai bandaraya nya apin lama ke udah, madahka diri temegah ati lebuhka dipadah pasal penyulut pemutus nya.
Tu mih pemujur ti deka dipeda kitai. Ex- nembiak sekula nya, Bonia Galang ti benung nampung pelajar ba SM Sains Miri diatu mega bulih 5A ba peresa UPSR taun 2013,” ku iya.
Ku Dennis, penyulut pemutus nya endang patut ulih dijapai berindik ari penyakah bala pengajar ngajar enggau apai indai nyengulaka anak sida.
Ku iya, bala pengajar ba SK Long Kevok udah bejalaika tanggungpengawa sida enggau manah nempa pengerindu nembiak belajar nyengkaum chara belajar ti engkeman ngambika bala nembiak seruran rindu belajar.
“Baka nya mega bala apai indai sida ti ngembuan ulah ke positif sereta runding ti tebuka bekaul enggau pengidup anak sida jemah ila. Nya alai ba aku, tu ukai semina meri pangka ti positif ba nembiak aja tang mega meransang sida taluk agi ke pelajar,” ku iya.
Bekaul enggau Amo seduai Arlyina, Dennis arapka seduai ulih nampung pelajar ba SM Sains Miri tauka Kolej Tun Datu Tuanku Haji Bujang ngambika seduai sama bela ulih besukungka pangan diri.
Iya mega ngelalau seduai nyendiaka diri napi jalai pengidup ke mar pengudah beselara ari apai indai sekumbang ti nampung pelajar.
“Tebal agi nembiak Penan enda mujur besekula ketegal enggai beselara ari apai indai, nya alai ba runding aku kitai patut seruran meransang sereta nyukung ngambika sida ulih fokus ba pelajar laban semina nengah pelajar aja pengidup bansa Penan ulih berubah manah,” ku iya.
Ari penyampau 63 buah sekula primari di Baram,semina 19iku nembiak nyengkaum dua iku ari SK Long Kevok bulih pemutus 5A ba peresa UPSR taun tu.
SK Long Kevok ba kandang menua Tutoh Apoh, Baram ti ngembuan 11 iku pengajar enggau 163 iku nembiak.
Sekula nya semina ulih dilawa ngena kerita 4WD.