Dikarang Rengenyan Labang//
TERIMA KASIH: Seiku ari penerima surat pala tanah meri terima kasih ngagai Adenan seraya diperatika (ari kiba) Ranum enggau Nansian sereta bala bukai.
Pengawa nyukat tanah endang dipejalaika belama lalu surat pala tanah dikeluarka ninting taun
BAU: Penemu ti madahka pengawa nyukat tanah dipejalai ketegal pengawa bepilih deka diatur, patut diubah tauka dibuai.
Kepala Menteri Datuk Patinggi Tan Sri Adenan Satem madah, pengawa nyukat perimeter sereta ngeluarka surat pala tanah dipejalaika ninting taun.
“Pengawa nyukat tanah deka dipajakka, aku nemu bisi orang madah laban kitai nyau deka bepilih nya alai meri surat pala tanah.
“Pengawa nyukat sereta meri surat pala tanah tu dipejalaika belama, ukai maya pengawa bepilih aja, nyauka ninting taun tanah bisi disukat sereta diberi surat pala tanah.
“Nya alai anang bepenemu baka nya (anang madah ketegal pengawa bepilih nya alai pengawa nyukat enggau meri surat pala tanah dipejalaika),” ku iya.
Adenan mansutka pekara nya lebuh bejadi ‘Majlis Penyampaian Warta Rizab Komunal Bumiputera Seksyen 6, Surat Hak Milik Tanah Seksyen 18 dan Cek Pampasan Tanah’ ti diatur Opis Tanah enggau Survei (JTS) Bagi Menua Kuching ba Dewan Suarah Bau ditu, kemari.
“Enti tanah NCR nya udah disukat dia orang ke ngempu tanah deka berasai lantang ati laban tanah nya udah temu enggi sida, tang enti bedau disukat sida irau ati kelebih agi ti diau di menua pesisir, laban di mengeri udah disukat sereta bisi pala tanah,” ku iya.
Kelimpah ari nya Pemangku Ketuai JTS Bagi Menua Kuching Abang Jamallidon Abang Ullie madah, naka 31 Oktober 2015 nengah Program Nyukat Perimeter NCR Inisiatif Baru di serata Nengeri Sarawak, bisi 425,999 hektar udah digazet nyadi Rizab Komunal Betanam Betupi Bumiputera di baruh Seksyen 6 Kanun Tanah Negeri (KTN).
Ba bagi menua Kuching aja ku iya, bisi 25 kandang endur ti mungkur tanah pemesai urung 36,073 hektar tanah udah digazet nyadi Rizab Komunal Betanam Betupi Bumiputera di baruh Seksyen 6 KTN.
Nambahka nya,Jamallidon madahka di serata nengeri Sarawak bisi 214,114 surat pala tanah udah diberi ngagai pengempu tanah ti mungkur urung 291,337 hektar.
Ari penyampau nya, ba Bagi Menua Kuching aja bisi 42,482 surat pala tanah ari baruh Seksyen 18 KTN ungkup betanam betupi enggau endur berumah udah diberi ngagai pengempu tanah ti mungkur pemesai urung 32,509 hektar, ku iya.
Nitihku iya sebedau tu, JTS udah nyuaka 361 surat pala tanah ari baruh Seksyen 18 KTN ngagai peranak Kpg Serasot Bau sereta Kpg Sebiris, Sematan bisi 28 surat pala tanah Seksyen 18 KTN udah dikeluarka JTS.
“Sehari tu aja kitai nyuaka 150 iti surat pala tanah ari baruh Seksyen 18 KTN dikena betanam betupi ngagai peranak Kpg Serasot, Bau; bisi 54 surat pala tanah ngagai peranak Kpg Sebiris, Sematan enggau 107 surat pala tanah diberi ngagai peranak Kpg Sibuloh dibaruh Program Nyukat Perimeter NCR Inisiatif Baru.
“Bekaul enggau Warta Seksyen 6 KTN ti diberi sehari tu iya nya Kpg Stenggang, Lundu mungkur urung 2,694.64 hektar digazet nengah Swk. L.N. 164 kena 21.11.2013 enggau Kpg Temaga Dayak, Sematan Lundu ti mungkur urung 62.662 hetar digazet nengah Swk. L.N. 126 kena 26.07.2013.
Kelimpah ari nya, iya madahka peranak menua ti kena bungkur projek Jalai Besai Pan Borneo sepemanjai jalai ari Tanjung Datu ngagai Sematan ti pemanjai urung 32.77 kilometer mega deka diberi pampas.
“Sehari tu mega kitai meri pampas ngagai peranak ti kena bungkur projek Jalai Besai Pan Borneo ari Tanjung Datu ngagai Sematan ti pemanjai urung 9 km keterubah ngagai 145 penerima chek enggau penyampau chek lebih RM8.2 juta,” ku iya seraya madahka pampas ke bukai deka diberi enti pengawa nyukat tanah ti kena bungkur projek nya udah dipejalaika.
Sama bisi ngulu pengerami nya Kaban Kunsil Nengeri (ADUN) Tasik Biru ti mega Menteri Muda Pemansang Raban Bansa Datuk Peter Nansian Ngusie, ADUN Opar Ranum Mina, Sapit Menteri Bumai enggau Industri Betanam Betupi ti mega Kaban Parlimen Mas Gading Anthony Nogeh Gumbek enggau ke bukai.